Shillong, Rymphang 16 : Hynnin ka sngi, u National General Secretary ka TMC, u Abhishek Banerjee u la leit iuhkjat sha Tura bad u la don bynta ha ka rally ïaid kjat. Ha kane ka jingïalang, u la ai jingkren sha ki paidbah. Ha ka jingkren ka jong u, u la ong “ haba phi ñion ïa u budam kaba don ia ka shap jong ka Trinamool Congress phi vote ïa ka Mamata Banerjee”, da kaba kdew ba ka vote ka poi beit sha ka Mamata Banerjee. Kane ka long ka jingkylla ha ka jingong jong ka TMC shibnai mynshuwa ba ki Garo kin synshar ïa ka Garo Hills bad ki Khasi kin synshar ia ka Khasi Hills.
U Abhishek Banerjee u la ong ruh, “ ka Meghalaya ka donkam ïa u nongïalam uba shisha uba lah ban ïaleh na ka bynta ki paidbah ban ïa kaba shah synshar kylla ha kiba shong ïing lieh ïing saw ha Delhi bad ha Guwahati”.“Haba ïakren halor kane, u Bajop Pyngrope, uba dei u nongaiktien ka NPP u la ong ba ki jingkren jong ki nongïalam ka AITC kam pynsngew phylla shuh ïa u.
Hooid, ka AITC kadei ka party Bengali, bad baroh ki la ïohi aiu ka la jia ha kiwei pat ki jylla kum ha Tripura namar hadien ka election, ki la ïehnoh ïa kane ka party.“Kine kiba rung sha ka AITC kin sa iehnoh hadien ka election bad ki paidbah ka jylla ki tip bha ïa kata. Ban thep vote na ka bynta ka Mamata Banerjee kam dei ka kamram jong ki paidbah ka jya Meghalaya. Ha kawei na ka video kaba la saphriang kylleng ha ki social media ki paidbah ki ïohi ba ka Mamata Banerjee kam don jingtip satia wat ïa ki kyrteng jong ki jait ki kynja kiba don ha ka jylla bad ka jingpan vote jong ki kam don nongrim.U Abhishek Banerjee u la pynkynmaw ba ka NPP ka ju kren ïa ka TMC ha manla ki jingkren, bad kane ka pyni ba katno ka TMC ka la ïaid lynti ha kine ki arsnem.
Haba kylli halor kane, u Bajop Pyngrope u la jubab, ba kane ka long ka nuksa ïa ka jingkiew jong ka NPP, bad bun ki party ki sngewtynnad lada pynpaw ïa ka kyrteng jong ka party ka jong ki ha Assembly. U la ong ba ka election ka dei ka jingïaleh hapdeng ki ar lane bun tylli ki party. Ha kane ka jingïaleh, ngi dei ban pynsngewthuh sha ki paidbah ïa ka jingma jong ka AITC namar kane ka party kam don hi ruh ha ka jylla jong ngi naduh mynshuwa. Ka jingleh ka jong ki ban pynpait pynpa ïa ka West Bengal ladei ban wanrah ha ka mat ïakren. U la ong ruh ba ka jingthep vote ïa ka Mamata Banerjee kam long katkum ka jingkwah ki paidbah ka Meghalaya. Ka AITC ka lah ban tan ïa ki briew da kaba kular ban pynpoi pisa, ban aikam bym lah ban long bad ki pan kylliang da ka vote na ka bynta ka Mamata Banerjee, ym don uwei ruh ban vote ïa ka AITC. Phim tip ba wat ka Mamata Banerjee ïalade ka dang shah pynrem ha West Bengal bad ka hap ban ap haduh ka bye -election ban shah jied? Lada ki paidbah ka West Bengal bad ha ka constituency jong ki kim vote ïa ka, tang mano ban vote ïa ka ha Meghalaya, Tripura bad ha kiwei pat ki jylla.
