Pynngat kyndon thymmai biang ki pulit ïa ki nongïalam ka KSU ong u President ba rim

Shillong, Nailar 30 : U President barim ka Khasi Students’ Union (KSU) Bah Lambokstar Marngar ula kynnoh ba ki Pulit kila pynngat kyndon lane case thymmai pyrshah ïa ki laingut ki nongïalam ka KSU Seng Kmie ba la shah kem ha ka miet 19 tarik mynta u bnai.
U Bah Lambokstar ula pynpaw ïa kane hadien ka jingleit synran ïa ki laingut ki nongïalam ka seng ban leh medical checkup ha ka sngi Saitjaiñ ha Civil Hospital, Shillong.
Kine ki lai ngut ki nongïalam ki dei u President u samla Raymond Kharjana, General Secretary u samla Reuben Najiar, bad u Vice President u samla Pynkmenlang Sanmiet.
Haba kren bad ki nongthoh khubor, u Bah Lambok ula ong ba ka medical examination ka pyni ba ki don ki kyndon thymmai ba la bynrap pyrshah ïa kine ki nongïalam ba shah kem.
“Kat kum ka jingsngewthuh jong ngi, haba ïalam leh medical check-up, la sngewthuh ba ki don ki case thymmai ba la pynngat pyrshah ïa ki. Haduh mynta, ngam pat lah ong haduh katno ki case la pynngat pyrshah ïa ki nongïalam ba shah kem” ong u bah Lambok.
U ong ba ka Sorkar ka lah ban bteng ha ka ban pynngat ïa ki nongïalam ka KSU ha ki case thymmai, hynrei kan ym pynlong ïa ka Union ban klet noh ïa ki jingdawa ba la buh hakhmat ka Sorkar.
“Ka Sorkar ka lah ban bteng ïa ka jingkem ïa ki nongïalam bad ki dkhot jong ngi, hynrei ka Seng kan ïai bteng ban ïeng skhem halor ki jingdawa” ula ong.
U Bah Lambok ula pynshai ba ka KSU kan ym dawa ban pynlait ïa ki nongïalam, hynrei kan pynbor ia ka Sorkar ba kan pyntreikam ïa baroh ki jingdawa bala buh hakhmta da ka Seng.
Ula bynrap ba wat ha ka jingïalang ba dang shu dep ba la pynïaid da u Myntri Rangbah, ka seng kam shym la dawa ban pynlait ïa ki nongïalam ba shah kem.
“Watla ngim pat hun 100 na ka 100 bad ki jingkular ba la ai da u Myntri Rangbah, ngi sngewthuh ba kumba 70-80 % na ki jingdawa jong ngi la pynurlong da ka Sorkar Jylla” ula ong.