Hadien da ki phew snem urlong ka jingthrang ki paidbah, pynurlong u CM ïa ka jingkular

By Mawphor Editor On Aug 31, 2026

Shillong, Nailar 30: Ka jingthrang bad ka jingangnud jong ki paidbah jong ka dong ka thain kiba hap hapoh ka Hima Bhowal ban ioh ïa ka surok kaba heh kumba long lem ha kiwei de ki shnong mynta kala urlong hadien ba ki kam mynta kila ïaid sha khmat ban pynheh ïa ka surok naduh Phlangwanbroi haduh Dangar.
Kum ban shu kdew mynshem snem ha ka por ba u Myntri Rangbah ka jylla u Conrad K Sangma u wan sha ka thain khappud ha Dangar bad kiwei de ki thain ban ïalap election MDC, ka Dorbar Shnong Dangar kala ai da ka dorkhas sha u bad khlem da pynslem mar mar u la ai ka jingkular ba un sa leh eiei na ka bynta jong kane ka surok.
Kane ka jingkular jong u Myntri Rangbah mynta kala urlong bad mynta ka long ka jingkyrkhu ïa ki paidbah hynrei ka long pat ïa ki paidbah ba kin dei kiba ïai shah tang katto katne bnai namar ki kam kila ïaid shaphrang.
Ïa kane na ka liang jong ka sorkar kala pynioh lyngba ka state scheme bad kat kum ka jingiathuh ki paidbah ha kane ka scheme un ym don ka jingsiew bai lut ksan namar ba ha ki shnong briew kan ym ktah ïa ki ïing briew hynrei kan shu pynbha beit tang ïa ka surok, katba sha ki jaka bym don ki ïing ki sem la nang pynheh shuh shuh ïa ka surok.
Hapdeng jong kane ka jingpynheh ïa ka surok ka don pat kawei ka jingthut namar ka jingïaid da ki spah ki trok kit coke bad kane kala buh ïa ki paidbah ha ka jingeh namar ba da ki kynta kila hap ban ap ha surok ban ioh pass ïa ki.
Kumba la sakhi la lap ruh ruh ïa ki trok kit coke kiba la kylla lem bad kiwei de ki kali katba ka jingshna pynheh surok ka dang ïaid shaphrang.
Shuh shuh kum ban shu kdew ha ka por ba long MLA u Bah Himalaya M Shangpliang u la ju dawa na ka sorkar ba dei ban pynbha noh ïa ka surok naduh Weiloi sha Dangar, hynrei mynta kane kala urlong ha kaba ka sorkar kala pynbna ba naduh Weiloi haduh Phlangwanbroi yn pynheh ïa ka surok na ka jingbei tyngka ka World Bank bad ïa kane ka surok na Phlhangwanbroi shaduh Dangar-Umpung na ka state plan.
Na ka liang u Bah H Syiemlieh uba dei u Rangbah Shnong ka Dangar u la ong, kane ka long shisha ka jingkyrkhu ïa ki paidbah jong ka dong ka thain namar ba la slem bha la angnud ban don ne ioh ïa kum kane ka surok bad kane kan ïarap bha ïa ki paidbah bad u la kyntu ïa ki paidbah ban ïai shah shipor katba ka jingtrei ka dang ïaid shaphrang.