Pynngat kyndon aiñ ka Lokayukta ïa u CEM bad 11 ngut ki MDC ka GHADC halor ki kam bamsap

Tura, Jymmang 24 : Ka Meghalaya Lokayukta ka la pynngat ha ki kyndon aiñ (chargesheet) ïa u Chief Executive Member (CEM) barim ka GHADC u Boston R Marak, u MDC ka Asananang Ismail Marak bad 11 ngut ki MDC barim bad ki Nongtrei, ki Contractor ka Council namar ki kam bamsap.
U Ismail Marak u dei ruh u MLA barim ka Rongram hashwa ban phiah ïa ka constituency.
Ha ka hukum ba pynmih ha ka 18 tarik Jymmang, 2023, u Chairperson ka Meghalaya Lokayukta u Bah B Dhar, ula hukum ïa u Director of Prosecution ban aiti ïa ka case record sha u Public Prosecutor ka West Garo Hills, Tura ban tian bishar ha ka ïing Bishar ba kyrpang ha West Garo Hills, Tura pyrshah ïa ki 13 ngut kiba la shah pynngat ha ki kyndon aiñ 7 bad 12 jong ka Prevention of Corruption Act, 1988.
Kane ka kam bamsap ka ïadei bad ka jingujor bala mudui da u Nilberth ChM arak na Dawa Gittingre, East Garo Hills District ha ka ïing Bishar Lokayukta myn ha ka 2 tarik Jymmang 2019, kaba long pyrshah ïa u Ismail Marak, MDC barim ka Asanang namar ka jingpyndonkam bakla ïa ka song pisa ba kot T. 1 klur ba la mang sha ki project bapher bapher ha Asanang Constituency.
Kat kum ka jingpyntip u nongmudui, ki don haduh 49 tylli ki project ba la ai sha ka Asanang Constituency hynrei ïa kine ki project la shu pyntrei thohmut thohmat, kaba pynsuba ïa ka jingbamsap kaba shyrkhei.
Hadien ka jingsdang ka jingtohkit, ka Lokayukta ka la ishankhmat pyrshah ïa u Ismail Marak bad bun kiwei kiwei. Dei ha ka 24 tarik Naitung, 2019, ka Lokayukta ka la hukum ïa ka jingtohkit jong ka Central Bureau of Investigation (CBI) halor kane ka kam. Hynrei ïa kane ka hukum la tynjuh bor noh hapoh ka ïing Bishar Meghalaya High Court lyngba ka writ petition (No. 293 of 2019).
Hadien ka jingïakhun mukotduma ba la neh slem, ka ïing Bishar Division Bench kala pynwai noh ïa ka mukotduma ha ka 6 tarik Iaiong 2021, da kaba phai biang sha ka ïing Bishar jong ka Lokayukta.
Ha ka 18 tarik Rymphang 2022, ka Meghalaya Lokayukta ka la bthah ïa u Director General of Police (DGP) ka Jylla ban tohkit halor ka case kat kum ka kyndon 20 (5) jong ka Meghalaya Lokayukta Act, 2014 bad ban phah ïa ka kaiphod ha ryngkat bad ka jingpynngat kyndon aiñ (charge sheet).
U Investigation Officer (IO) ula ïatyngkhuh ïa shibun ki jingeh bad ki jingjia bym lah kiar, kaba la lam sha ka jingslem ka kam. Hynrei watla katta, hadien shisnem, ka jingtohkit kala kut bad ha ka 18 tarik Jymmang, 2023, ïa ka kaiphod jingtohkit ba bniah bha la aiti sha ka Iing Bishar ka Lokayukta.
Halor ki jingshem na ka jingtohkit, ka Lokayukta ka la hukum ïa u Director of Prosecution ban aiti ïa ka case sha u Public Prosecutor ka West Garo Hills, Tura ban tian bishar ïa kine ki MDC bad Nongtrei ka GHADC hapoh ka ïing bishar ba kyrpang ka West Garo Hills.
Ki briew kiba la shah charge-sheet ki dei :
1. Boston R. Marak, CEM barim, GHADC
2. Mark Goera B Marak, EM barim ka GHADC na Batabari constituency
3. Winnison Ch. Marak, Dy CEM barim ka GHADC na Rongrikimgre constituency
4. Jimbirth R Marak, EM barim ka GHADC na Amongpara constituency
5. Levastone T. Sangma, EM barim ka GHADC, Jenjal constituency
6. Righteous N Sangma, EM barim ka GHADC, Babellapara constituency
7. Rupert M. Sangma, EM barim ka GHADC, Tura constituency
8. Kenedick S Marak, EM barim ka GHADC, Siju constituency
9. Dhormonath Ch. Sangma, EM barim ka GHADC, Naguapara constituency
10. Ismail Marak, EM barim ka GHADC, Asanang constituency
11. Kubon Sangma, Contractor
12. Nikseng Sangma, Contractor
13. Hewingson A Sangma, Secretary, GHADC.