Thungkam kontrak ka MTDC ïa u Puranjan Das kum u CGM hadien ba la shongthait

Byrngem ka HYC ban pynlong da ka jingïakhih

0

Shillong, Jymmang, 24: Ka Hynñiewtrep Youths Council (HYC) ha ka sngi Balang ka la pyrshah ïa ka jingthung biang sa shi wat ïa u Puranjan Das kum u Chief General Manager jong ka Head Office, MTDC lyngba ka Contractual Basis.
Ha ka dorkhas ba la phah sha u Managing Director jong ka Meghalaya Tourism Development Ltd (MTDC) State Convention Centre, (Pinewood Hotel Annex) Bishop Cotton Road, Shillong, ka HYC ka la ong, “katkum ka jingtip jong ngi u Puranjan Das uba trei kum u Chief General Manager jong ka Head Office, MTDC, u la dei ban shongthait ha ka 31.03.2023. Hynrei la lap ba ka Corporation ha ka 31.03.2023 ka la thungkam biang ïa u kum u Chief General Manager lyngba ka contract basis naduh ka 01.04.2023 haduh ka 30.09.2023 ha ka jingsiew tulop kaba T. 1,57,968 shi bnai bad ïa ka kontrak jong u lah ban pynthymmai biang da ka Corporation hadien ba la kut ki hynriew bnai.
“Ka HYC ka pyrshah jur ïa ka jingthungkam biang da ka MTDC ïa u briew uba la shongthait bad ka jingsiew ïa u da kajuh ka tulop katba u dang don ha ka kam. Kaba ar, kane ka jingpyrshang ban thungkam ïa ki shakri sorkar kiba la shongthait kan pynmih ka jingbymdon ki kam kiba lait na ka bynta ki nongwad kam bad khamtam eh ïa ki samla jong ka jylla jong ngi,” la ong ka Seng ha ka dorkhas ba la soi da u General Secretary ka HYC u Bah Roy Kupar Synrem ba la phah kopi ruh da u Bah Paul Lyngdoh uba dei u Myntri uba peit ïa ka tnat Tourism ka Sorkar Jylla bad sha u Bah Sanbor Shullai uba long u Chairman jong ka MTDC.
“Kum ka seng, ngi pyrshah jur ïa kane ka rukom leh kaba pynduh lad ïa ki samla kiba la nang la stad kiba dei hok ban ïohkam ha ki tnat treikam kiba hap hapoh ka jingpeit jong ka Sorkar ha ka jylla,” la bynrap ka dorkhas.
“Ngi dawa ïa ka ophis jong phi ban pyndam mardor ïa ka kontrak jong u Puranjan Das kum u Chief General Manager ka MTDC, hynrei lym kumta ngim banse ban pynlong da ka jingïakhih pyrshah ïa ka Corporation namarba kane ka long ka jingpynduh ïa ka hok ïohkam jong ki trai jylla kiba la nang la stad bad ïa ki samla wadkam,” la byrngem ka Seng.

Leave A Reply

Your email address will not be published.