Shillong, Risaw, 24: Ka jinglehniam ïa ka Durga Puja jong ki riewngeit Hindu ha kane ka jylla Meghalaya ka la kut noh ha ka sngi Baar da ka jingpynngam ïa ki blei ha ki jaka kiba la buh bad ha nongbah Shillong la pyngam ha Wah Umkhrah.
Ha ki sngi ba la sdang ïa ka jinglehniam Puja la sakhi ba ki riewngeit Hindu ki la pyndep ïa ki jingleniam jong ki da ka jingriewblei bad ki leit ban jngoh ruh ïa ki Pandal kiba la shna kyrpang ha kylleng ki jaka da ka jingkmen.
Ha ka jingpynngam um ïa ki blei ha ka jaka ba la buh da ki bor synshar jong ki District la synran lang da ki Pulit kiba la pynkhlaiñ ïa ka jingpahara khnang ba kane ka jingpyndep ïa ka lehniam leh rukom kan long kaba ïaid beit khlem kino kino ki jingshah pynthud.
La sakhi ruh ïa ka jingtem ïa ki ksing ki nakra bad ka jingïashad ïa kynhoi jong ki riewngeit Hindu naduh kiba la heh la san shynrang bad kynthei haduh ki hep kiba rit kiba la ïashim bynta lang ha ka jingleit pynngam um ïa ki blei.
Ki iew ki hat ki la khang lut ha Iewduh bad ha Police Bazar kiba long ki kad khaii kiba heh tam ha kane ka jylla Meghalaya.
U General Secretary jong ka Central Puja Committee (CPC) u J.L Das u la ong ba mynta u snem ka jingwan jong ki briew ka kham duna bad ka jingpynngam um ïa ki blei ka la sdang por 12.00 baje noh sngi bad la lah ban pyndep ïa kane ka jinglehniam haduh ka por 5:00 baje janmiet.
La ïathuh ki don 58 tylli ki blei ba la pynngam um, hynrei kin don ruh na ki blei ba la wanrah da ki shipai BSF bad ki shipai Air Force ban pynngam um namarba ha nongbah Shillong la bthah ban pyngam um ïa ki blei tang ha Wah Umkhrah.
