Ka jingkren jong nga ïa ki lad pathai khubor ka long ban hikai ïa ki paidbah: Ardent

Shillong, Risaw 24: U Bah Ardent Miller Basaïawmoit, President ka VPP, u la ïathuh ba hynnin ka sngi, ki nongïalam jong ka Meghalaya Editors and Publishers Association (MEPA) ki la wan ïakynduh ïa u ha ophis treikam jong ka Party ha Lad Nongkrem ban ïakren bad ïaphylliew jingmut ha kaba ïadei bad ka jingkren jong u ha ka jingïalang kaba la long ha ka Urksew, Pynursla ha ka 18 tarik mynta u bnai, ha kaba ka Shillong Press Club, ka la pynpaw ka jingsngew bitar bad dawa ruh ban panmap halor kane ka jingkren jong u.
U Bah Ardent u la ong ba kane ka jingïakynduh bad ka MEPA ka long kaba sngewtynnad bad kaba seisoh shibun, ha kaba u la pynshai kaei ka jingmut kaba don ha kaba ïadei bad ka jingkren jong u ha katei ka sngi. U nongïalam ka VPP, u la ong ba ka jingkren jong u ha katei ka sngi, kam dei satia kaba u kdew ne kynnoh ba ha Meghalaya ruh ki lad pathai khubor ki treikam ne pynmih khubor kaba noh shiliang ne kaba ki pynmih katkum ka jingïoh pisa, hynrei kadei ka jingpynshai bad ka jingmaham jong u ïa ki paidbah ba kin da puson bad bishar bha halor ki khubor ba ki ïoh pule ne ba ki ïoh ban peit, khnang ba kin nym shah ïalam bakla, hynrei ba kin pynshong nongrim bad shu ngeit beit kat kaba mih ha ki lad pathai khubor.
“Nga la kren da kaba shim nuksa ïa ka jinglong ki lad pathai khubor ha ki ri ka pyrthei, ha ri India bad ha kiwei kiwei de ki jylla jong ka ri India, khnang ba kaba kum kane kan nym wan jia ha kane ka jylla ruh”, la ong u MLA jong ka Nongkrem.
U la ong ruh ba kum ki nongïalam kadei kamram jong ki ban hikai ïa ki paidbah, kadei ka kamram jong ka Party ban maham ïa ki paidbah ba kin nym shah ïalam ha ki khubor kiba bakla bad ki bym shisha. U la ong ba ka Party haba ka leit pynlong jingïalang kylleng kylleng ka hikai bun kiei kiei kiba ban ïatei ïa ka imlang sahlang bad ïa ka jylla hi baroh kawei. Te namar ba ki lad pathai khubor ruh ki dei ka bynta ba kongsan jong kane, kadei ka kamram jong u, kum u nongïalam jong ka jylla ban kren ruh ïa kane ka bynta jong ki lad pathai khubor.
U Bah Ardent u la ai nuksa ruh ïa kawei ka khubor kaba la mih ha ki Private Youtube halor ka jingïalang jong ka VPP ha Pdengshakhap, namar tang na ka rukom pynmih ïa khubor ba bakla ïa kane ka jingïalang, ka la wanrah ka jingsngewsih ïa ki nongïalam shnong, ïa ki paidbah bad ïa ki nongïalam ka Party ha katei ka jaka, kat haduh ba kin hap ban ïashong lang ban ai ka jingpynshai ïa kane ka jingpynmih khubor.
U Bah Ardent u la kren shai ba um don kano kano ka jingthmu kaba sniew ne kaba un shunïa ki lad pathai khubor bad um kwah ruh ba ki paidbah kin shun ne ki dom ïa ki nongthoh khubor halor ki khubor kiba mih, namar kadei ka kamram jong ki lad pathai khubor ban pyntip sha ki paidbah. Hynrei ki paidbah kidei ban long kiba stad bad kiba da bishar haba ki pdiang ïa ki khubor, namar u la ong ba kumba u ju kren ba kaba pule kot khubor ne kaba peit khubor kam dei kiba pule ïa ka Biblene ka kot niam ba ki briew kin ngeit beit, kumba la thoh, hynrei ki khubor kiba mih dei ban da wad jingtip ne pynshong nongrim ym ban shu ngeit beit kumba la thoh.
U President ka VPP u la ong ruh ba um ngeit ba ki nongthoh khubor ruh kin kyntait ba kam long satia kumba kren ma u ha Pynursla. Pynban kidei ban shim ba kane ka long kum ka lad ban ïatei ban pynbeit bad pynjanai ïa ka rukom treikam jong ki. Namar u la ong ba u sngewkhia bad ju shimkhia ruh ïa ka jingeh jong ki lad pathai khubor, ha kaba u la rah haduh arsien ha Assembly ïa ki jingeh jong ki nongthoh khubor.