Pynmih ka BP Thangkhiew Bamboo Industries ïa ki jingthang sma iwbih ka RIPL na ka jylla Assam

Nongpoh, Risaw, 11: Ha ka sien ba nyngkong eh ha ka jylla Meghalaya kawei ka kompani na ka jylla Assam ka Rajdip Innovations Pvt. Ltd ba la tip kum ka Nandeeka na ka jylla Assam ha ka sngi Balang ka la pyllait paidbah ïa u jingthang sma iwbih (incense stick) ba don kumba 22 tylli ki jait jingsma lyngba ki siej bala saiñ na ka BP Thangkhiew Bamboo Industries ka karkhana saiñ siej kaba don ha ka shnong Nongbah Myrdon.
Ïa katei ka jingïalang pynlait paidbah ban pynïaid ïew ïa utei u jingthang sma iwbih la pynlong ha Umsning ha ka jingdonlang u Bah BP Thangkhiew kum u trai jong ka BP Thangkhiew Bamboo Industries u ba dei ruh u President ba rangbah jong ka RBYF sengkmie ha ka jingdonlang ruh ki nongseng jong ka Rajdip Innovation Pvt. Ltd kiba kynthup ïa u Dipen Sharma bad u Rajeev Kunwar, ki nongïalam ka RBYF sengkmie naduh u Bah RJ Thangkhiew, u Bah Kynsai Nengnong, u Bah Bullet Marbaniang nalor kiwei kiwei ki nongïalam lem ki dkhot ka RBYF.
U Bah Bipul Thangkhiew kum u trai jong ka BP Thangkhiew Bamboo Industries haba kren ha katei ka sngi u la ong ba u la sdang ïa ka kam siej naduh u snem 2016 tang na ka bynta ban shna ïa ki ïing siej bapher bapher ba kynthup ruh ïa ki ïing baduk lyngba ka skhim PMAY, ki ïing skul, ki sem ri jingri bad lyngba ki siej u la sdang ruh ban pynïar ïa ki jingshna ïa ki ïing wat shabar ka jylla Meghalaya bad kylleng ki jaka jong ka Ri India, hynrei kum kawei na ki district kaba bun ruh ïa u siej rñai bad shken u la ïoh pat ban ïakynduh bad ki nongseng jong ka karkhana pynmih ïa ki jingthang sma iwbih bala tip kum ka Rajdip Innovations Pvt. Ltd, namar kitei ki jait siej ki dei kiba biang tam ban shna ïa kitei ki jait jingsma iwbih.
Dei halor katei ka jingpahuh ki jait siej ha ka them Ri-Bhoi, u Bah Bipul Thangkhiew u la phaikhmat pat sa sha kane ka kam ban shna ïa ki diengsiej hadien bala dep ban saiñ bha ïa ki ban nang pynïar ïa ki jingpynmih bapher bapher lyngba ka jingpyndonkam ïa ki siej hadien ka jingïakynduh bad kitei ki nongseng ïa katei ka karkhana ban pynmih pat sa ïa u jingthang sma iwbih bala ju tip paidbah ruh kum u dhup ne agarbati.
U la ïathuh ruh, ba ha ka jingïaid lynti ban trei ïa ki kam shna iing shna sem la lap ba u siej ba ju pyndonkam bha u dei u siej iong bad u siej skhong hynrei u la lap ruh ba kine ki jait siej kim dei kiba da don bun bha hapoh Ri-Bhoi District bad la ïoh tang ha Ladlasharai, Mawleiñ Mawkhan bad Umkei bad kine ki jait siej ki dei ba don bun pat hapoh South West Khasi Hills bad ha West Khasi Hills District.
“Katkum ka jinglap jong nga, ka District Ri-Bhoi, kadei kaba pahuh bha ïa u jait siej rñai bad skhen bad nga la lap ruh ba dei tang u siej rñai u dei u ba la pynmih bha ha ki shnong ki thaw jong ka Ri-Bhoi District bad tang na ka thaiñ Umden, Marngar ruh ki ju shalan kumba 7000 tylli shisngi bad baroh ki siej ki leit beit sha Assam bad hadien ka jingnang wad jingtip la shem ruh ba ujtei u jait siej u dei u biang tam ban shna bad pynmih ïa ki jingthang iwbih (incense Stick) hadien bala dep saiñ bha ïa ki ha ka rukom kaba dei” la ong u Bah Bipul da kaba bynrap ruh ba dei hadien katei ka jinglap ïa utei u jait siej ba biang ban pynmih ïa kitei ki jait jingshna ula sdang pat ban pynmih sa ki siej bala saiñ (Bamboo Stick) ha u snem 2022 ha ka shnong Myrdon Nongbah kiba don ha ka jingheh bapher bapher.
U la ong ruh ba lyngba ka jingsdang ban shna bad saiñ ïa kitei ki siej ka long ruh ka kabu ïohkam ïa kiba bun ki khun samla naduh ki trai siej kiba die ïa ki siej, ki nongpom siej, ki nongshalan, bad kumjuh ki nongtrei ha ka karkhana lyngba ka jingnang ban pyndonkam ïa ka spah mariang kaba lah ban ïoh na ka district, ha kaba na ka liang katei ka kompani ka la lah ruh ban sdang pynmih ïa kitei ki jait jingsma iwbih ha ka jylla Assam, Tripura bad mynta hapoh ka jylla Meghalaya.
Shuh shuh u la ong ruh ba lyngba katei ka jingpynmih ïa kitei ki jait jingthang sma iwbih lyngba ki siej bala saiñ na katei ka karkhana kaba don ha Ri Bhoi kyrmen skhem ba ki paidbah kin ai ka jingkyrshan na ki paidbah kumba la angnud ruh ban shalan ym tang ha ka jylla Meghalaya hynrei wat shabar jylla, u la bynrap.