Lahduh ka Synod HSS ha ka jingïakob rwai rakhe 50 snem ka MBoSE

Shillong, Risaw, 11: Ka Synod Higher Secondary School, Shillong ka la long ka skul ban ïohrah ïa ka nam lahduh ha ka rynsan ïakob rwai Choir ba la pynlong da ka Meghalaya Board of School Education (MBoSE), Tura kum shi bynta ka jingrakhe ïa ka jingïaid lynti kaba 50 snem kynthih jong kane ka shlem treikam kaba peit ïa ka pule puthi bad kaba ju pynïaid ïa ki eksamin ha kane ka Jylla.
Da kane ka jingjop ka Synod Higher Secondary School, Shillong ka la ïoh khur ïa ka song pisa kaba T. 30 hajar, ka St.Mary’s Higher Secondary School, Shillong kaba la wan baar ka la ïoh khur ïa ka song pisa kaba T. 20 hajar bad ka Kiddies Corner Higher Secondary School, Shillong kaba wan balai ka la ïoh khur ïa ka song pisa kaba T. 15 hajar.
Ïa kane ka jingïakob rwai la buh ruh ïa ka phang, “Celebrate the past, Embrace the present and Rise to the Future” la pynlong ha U Soso Tham Auditorium, Shillong, ba la ïashim bynta da ki 8 tylli ki skul na East Khasi Hills district bad ki nongbishar ha kane ka jingïakop rwai ki long u Bah B. Latam, ka Kong P. Warjri bad u Bah W.Nongsiej.
La sam ïa ki khusnam sha ki nongjop da u Executive Chairman jong ka MBoSE u C.P Marak uba la long kum u Kongsan ha kane ka sngi, ryngkat ka jingsakhi lang jong u Joint Director ka MBOSE, Regional Office, Shillong u Bah Macdonald Marbaniang, ki nonghikai na ki skul bapher bapher, ki kmie ki kpa bad ki khynnah skul.
Ka Synod Higher Secondary School kaba long ka kynhun lahduh ha kane ka rynsan ïakob ka la shah jied ban leit rwai ha ka 19 tarik mynta u bnai ha nongbah Tura, West Garo Hills District ha ka sngi pynhap pyrda ïa ka jingrakhe dap 50 snem jong ka MBoSE.