Pynlong prokram ai jingpynshai ka tnat pulit EJHD halor ki lai tylli ki mat ba donkam

Khliehriat iaiong 19: Ka tnat pulit jong ka East Jaiñtia Hills District, lyngba ka ophis jong u Superintendent of Police mynta ka sngi ka la pynlong ïa ka prokram ai jingpynshai lane ka awareness prokram ha Jaiñtia Eastern College Khliehriat ha kaba la ai ïa ki jingpynshai halor ki lai tylli ki mat ba donkam, kiba kynthup ki aiñ bad ki lad jingiarap bad jingiada ïa ka jingshah thombor ki kynthei ki khynnah, ka jingma haba pyndonkam ïa ki drok bad ka jingma haba ñiah khlemakor bad khlem pyrkhat lane ka Road safty.
Haba kren kum u kongsan, u MLA ka thaiñ uba dei ruh u myntri sorkar, u bah Kyrmen Shylla, u la pynpaw ka jingsngew khia bad ong ruh ba tang ban tip ïa ka ba bha kam pat biang hynrei dei ruh ban da leh badn pynmlien ban long adkar ha kiei kiei baroh, ha ba kren halor ka jingshah thombor ki khynnah bad ki kynthei bad kito kiba dih drok, da ka mynsiem ba sngew khia u la ong ba bunsien kiba leh ïa kum kine ki kam ki dei kiba la tip ba kine ki dei kiba long beaiñ, hynrei ki iai leh pat ïa kum kine ki kam bymman ha ka imlang ka sahlang. U la kyntu ruh ba lada don kano kano ka jingshah thombor ki dei ban pyntip sha ki pulit bad kumjuh ruh sha ki One Stop Centre ban dup ioh ïa ki jingiada ban lait na kaei kaei kaba sniew. Haba kren shaphang ka jingsniew u drok, u la kyntu ïa ki samla bad ïa baroh ba dei ban kiar na kaba dih drok, bad lyngba ki nuksa bapher bapher u la khring ïa ka jingmut jong ki samla ban long kiba khlaiñ ha ka bor jingmut jingpyrkhat bad ban long kiba adkar.
U Deputy Commissioner ka East Jaiñtia Hills District, u Abhilash Banarwal, IAS, u la kren halor ka ‘Road Safty’ bad ka jingsniew ba mih na ki drok, haba kren shaphang ka jinglong adkar ha ba ñiah kali ne ñiah ïa ki ar shaka, u la kyntu jur ïa ki nong ñiah ba ki dei ban da pyndonkam ïa u seat belt bad ïa kiba ñiah ïa ki ar shaka ba ki dei ban da phong ïa ki helmet bad ym dei ban ñiah stet than ïa ki kali “Ym don Hero ha ka jingjia aksident” u la bynrap
Haba kren sahphang ka jingsniew u drok, u la ong ba kiba dih drok ki dang mut ba kin lah ban tehlakam ïa ka jingmut jingpyrkhat da u drok hynrei phewse kaba ma ka long ïoh ba u drok un tehlakam pynban ïa ka jingim jong ki, kumta u kyntu ba lada don kiba la ngaop ha u drok lane kiba don kano kano ka jingeh kin sngew bha ban leit sha ki Centre ba la buh ha Khliehriat Higher Secondary School bad ban leit ruh sha ki OST kaba don ha Khliehriat Hospital ba kin dup ioh ïa ki jingiarap da ki dawai bad ki jingiasyllok na ki councellor.
U Superintendent of Police ka East Jaiñtia Hills District, u Jagpal Singh Dhonoa, u la ong ba ka tnat ka la pynlong ïa kum kane ka awareness prokram namar kine ki lai tylli ki mat ki dei kiba ju buh jingeh bha ha ka imlang ka sahlang bad ka tnat pulit ka ju shim khia bha bad ialeh ban tehlakam ïa kum kine ki kam sniew bad haba kren shaphang ka jing ñiah kali lane ka Road Safty u la ong ba ym dei ban shu shaniah ne ngeit ha ka nusip hynrei dei ban long bunsien kiba adkar haba ñiah kali.
U Dy.S.P ka East Jaiñtia Hills District, u J.Mirom, u la ai ki jingpynshai da kaba pyni ruh ïa ki mat ba donkam lyngba ki projector bad kren halor ka jinglong adkar ha ba ñiah kali, u la ong ba baroh ki tip ïa kiei ki jingma kiba ap haba ñiah kali khlemakor hynrei kim leh pat ïa kiei kiei kiba dei ban lait na ki jingjia ba sngewsih, shibun kiei kiei kiba iadei bad ka ain, kiba iadei bad ki kyndon niah kali la pynshai lyngba ki jingthoh ba la pynpaw (display) ha ka projector
Haba kren shaphang ka ‘Road Safty’u bah Mirom u la pynpaw ruh ba ha East Jaiñtia Hills District ki la don haduh 29 ngut kiba iap ha ka jingiatyngkhuh kali bad mynta u snem kat haduh une u bnai jymmang ki la don shiphew ngut bad lada khleiñ lang baroh ki la don haduh 39 ngut, kumta ua la kyntu ïa kiba ñiah kali ba ki dei ban long adkar haba ñiah kali ban lait na kano kano ka jingjia ba sngewsih.
Kumjuh ruh ka Sub-Inspector jong ka Khliehriat Women Police, ka kong D.Shabong, ka la ai ka jingpynshai kaba bniah bha halor ki aiñ bad ki kyndon kiba iadei bad ka POCSO bad ha kajuh ka por ka la ai ka jingsngeng bad jingkyntu ïa ki khynnah samla khamtam kito kiba dang hapoh kyrta ba ki dei ban kiar na ka shongkha khynnah namar ka long kaba beaiñ bad lada lap ka aiñ kan pynshitom katkum ki kyndon jong ka aiñ, ka la ong ba lada ki ïa shongkha ha ka kyrta ba dang khynnah ka aiñ kan shim beit ba ka dei ka kam bat bor bad kan buh jingeh nyngkong eh ïa u shynrang, ka kong Shabong ruh ka la ai shibun ki jingpynshai kiba bniah da kaba pyni lane display ha ka projector.
U Dr P.Nongtdu, Principal Jaiñtia Eastern College, u la ai ka jingkhublei sngew nguh bad sngew burom ïa ka tnat pulit kaba la pynlong ïa kum kane ka prokram ai jingpynshai kaba long kaba donkam bha ban wanrah ïa ka imlang ka sahlang kaba lait na ki kam sniew bad na ka jysieh jong u drok, u la buh ruh ïa ki kyntien sneng kyntu ïa ki khynnha samla ba ki dei ruh ban shah shkor bha ïa ki jingpynshai bad ruh ban leh ïa kaba dei ka ba long na ka bynta ka bha ka miat ha ka longbriew man briew.
Kiba la ai jingkren ki kynthup ruh u Addl. S.P ka East Jaiñtia Hills District, u bah Banraplang Jyrwa, MPS bad kiwei kiwei.