pynlong ka SSA bad ka SRS ïa ka AIFF Referees Development Course

Shillong, Nailar 09: Ka Shillong  Sports Association (SSA) ryngkat bad ka Shillong Referees Society (SRS) hynne ka Sngi Balang ki la ïasnohktilang ban pynlong ïa ka AIFF Referees Development Course ïa kaba ba la sdang hynne ka sngi ka 9 tarik ha SSA Stadium bad kan kut haduh ka 12 tarik mynta u Nailar, 2023.
ïane ka Referees Development Course kaba la sdang naduh hynne ka sngi la wan ban pyniaid da u Pijush Biswas, u ba dei u AIFF Referees Instructor lem bad ki dkhot kiba na ka National Referee kiba la don ryngkat ha kane ka prokram ai jinghikai kiba kynthup ïa u Bah Ricky M. Synnah bad  u Bah Kynsanphar L. Nongum. Shuh shuh, ha kane ka Course yn pynlong ruh ïa ka Examination na ka bynta kito ki dkhot ba thymmai (Fresh) bad kumjuh ruh ïa ki ban sa shah pynkiew kyrdan (Level Holder).
Kane ka course  ka long kaba donkam na ka bynta ki Referee ban dang kyntiew shuh shuh . Kumban shu pynkynmaw, ka SSA mynta u snem hashuwa ban sdang ïa ka League 2023 ka la ïoh ban pynlong ïa ka Clinic cum refresher course ha kaba bun byllai ki Referee ki la ïoh jingmyntoi bad la sakhi ïa kane lyngba ka jingdon bun ki Referee kynthei kiba pyniaid ïa ki jingïalehkai ka SSA.
Ki la don haduh 47 ngut ki samla jong ka jylla kiba la wan ban ïashimbynta ha kane ka Referees Development Course, kiba kynthup 35 ngut ki shynrang bad 12 ngut ki kynthei. ïa kane ka prokram ai jinghikai la pynlong ha madan na ka bynta ka Practical bad ruh hapoh kamra (Class room) na ka bynta ka theory.
Kane ka Referees Development Course ka long ruh kumshibynta ka jingkyrmen ïa ka lawei jong ki khun samla hapoh ka jylla kiba don ïa ka jingangnud bad pyntbit bad pynjanai ïalade ha ka kam Referee.