Khliehriat Nailur 28: Ka tnat CSR jong ka Company Star Cement Lumshnong ha une bnai Nailur 2024 ka la pynlong ar tylli ki prokram sam dawai ei sha ki paidbah bad kawei ka prokram ai snam ei, ïa ki prokram sam dawai ei la pynlong ha ka 24 tarik Nailur ha Lumshnong bad ha ka 25 tarik pat ha shnong Brichyrnot bad ïa ka prokram ai snam ei la pynlong myn ha ka 27 tarik mynta u bnai Nailur ha Star Club jong ka Star Cement Lumshnong.
Ha ki prokram sam dawai ei ba la pynlong ka tnat CSR ka la pynlong ruh ïa ka jingai dawai khmat ne ka Free Eye Medical camp ha kaba ki la don haduh 100 ngut kiba la ïoh jingmyntoi kiba la wan sha kine ki prokram, kata 49 ngut ha ka Medical camp ha Lumshnong bad 41 ngut ha ka medical camp ha shnong Brichyrnot, kane ka jingsam dawai ei ba kynthup ruh ïa ka Free Medical Camp ka la long ka jingmyntoi ba khraw ïa ki paidbah nongshong shnong jong ka shnong Lumshnong bad Brichyrnot kumjuh ruh kito kiba na ki shnong ba mar jan.
Ha kaba ïadei bad ki prokram sam dawai ei ka tnat CSR ka la shim ïa ka jingïatreilang bad ka PHC Lumshnong ba la wan ban leh ïa ki medical check up da ka Dr Dakini Pala bad Dr Pritanka Shylla bad ruh na ka bynta ka Free Eye Camp ka tnat CSR ka la shim ïa ka jingïatreilang bad ka Bansara Eye Clinic ba la wan ban leh ïa ka medical check up ïa ki khmat ba la lamkhmat ïa ka kynhun da u Rishailang Sutnga, uba dei u Optometrist, u Benjamin Warlapih, uba dei u Outreach Coordinator
Ha kaba ïadei bad ka jingai snam ei ne ka Free Blood Donation Camp ka tnat CSR jong ka Star Cement ka la shim ïa ka jingïatreilang bad ka Kyrmen Foundation kumjuh ruh ba ka Civil Blood Bank Jowai ba la lamkhmat da ka Medical Officer Blood Bank Jowai, ka Dr I.Khynriam.
Ha ka prokram ai snam ei ki la don haduh 27 ngut kiba dei ki nongtrei jong ka company Star Cement Lumshnong kiba la mih shakhmat bad ai ei ïa ka snam bad la lah ban ïoh ban lum ne pynlang haduh 27 unit ka snam.
Na ka liang u General Manager jong ka tnat CSR Star Cement Lumshnong, u Kingshok Borah, u la ai khublei ïa ki doctor jong ka PHC Lumshnong kumjuh, ïa ka Bansara Eye Clinic bad ka kynhun na ka Kyrmen Foundation kiba la kloi ban ai ka jingïatreilang bad ka company ha kaba pynlong ïa kine ki prokram ai dawai ei bad ai snam ei, kumjuh ruh u la ai khublei ïa ki paidbah kiba la wan sha ki prokram ai dawai ei kumjuh ruh u ai khublei ïa ki nongtrei ka company kiba la kloi ban wan ban ai ei ïa ka snam,
U Borah, u la ong ba ka Blood donation camp ka long kaba donkam namar ka snam ka long kaba donkam kaba lah ruh ban ai jingim ïa kito kiba don hapdeng ka jingshah sumar ha ki hospital kiba donkam kyrkieh ïa ka snam, khamtam ki longkmie kiba kha khyllung bad kito kiba ngat ha ki jingmynsaw bad kino kino ki jingpang jingshitom bapher bapher kiba donkam ïa ka snam, u la bynrap ruh ba ka tnat CSR Star Cement na ka por sha ka por ka la ju pynlong ïa kane ka prokram sam dawai ei sha ki paidbah bad ka prokram ai snam ei bad kan nang ïaibteng ruh ban pynlong ïa kine ki prokram ha ki por ki ban nang wan, namar kine ki long kum ka jingshakri ïa ki paidbah ka thaiñ bad long ruh ka jingkyrkhu ïa ka imlang ka sahlang kumba ka company hi ka don ka jingthmu ban ai ka jingshakri ïa ka imlang ka sahlang da ki jingnoh syniang bapher bapher na ka bynta ka jingbit jingbiang ki paidbah.
Ha ka prokram Blood Donation Camp la ïadon ryngkat lang ruh u Management Representative ka Star Cement Lumshnong, u Drvander Bansal, u ADC East Jaiñtia Hills District, u Shiv Maliya, ka kong Dayosha Biam kaba la lam khmat ïa ka kynhun jong ka Kyrmen Foundation lem bad kiwei kiwei ki riew rangbah.
