Pynlong jingïalang ka EJMSEIA ban pynkhreh khaïi Dry-Port bad ka ri Bangladesh ha ïew khappud

Khliehriat, Nailar 28: Ka East Jaiñtia Mineral, Supplier, Exporters and Importer Association, hynnin ka sngi ka la pynlong ïa ka jingïalang ba kyrpang ha Sweet Chilie Hotel ha Mynkre ban pynshai halor ka jingioh lad bad jingpynkhreh ban sdang noh ïa ka ïew ha ka ïew khappud, ha East Jaiñtia Hills District, ka Dry-Port ha Huroi ban ïa khaïi bad ka ri Bangladesh, khamtam eh ha ka jingïa die ïa thied ïa ki mar poh khyndew hapdeng ka ri India bad ka ri Bangladesh, ka ban long ka jingmyntoi kaba khraw ka ban kyntiew ïa ka ïoh ka kot, ka ban wanrah ruh ïa ka roi ka kiew ha ka thaiñ.
Haba kren ha ka jingïalang, u Pa ‘iem Laborius.Manik.S.syiem, u Syiem jong ka Hima Mylliem, u la pynpaw ka jingsngew kmen halor kane ka jingioh lad ban ïa trei ha ka khaïi ka pateng bad ka ri Bangladesh kaba lyngba ka Dry-Port u la ong “ Hapdeng ka jingïoh kan don ruh ka jingkhlong, na kata ka daw khie leit khaïi da kaba shai da kaba khuid, da kaba bat ïa ka jinglong trai halor ka khyndew ka shyiap bad khaïi ban im ym ban khaïi ban bam duh.
Ha kajuh ka por, u Pa ‘iem Laborius, da ka mynsiem ka jingkmen u la ai ka jingkhublei kitbok kitrwiang ïa ki nongkitkam bad ki dkhot jong ka East Jaiñtia Mineral, Supplier, Exporters and Importer Association, ba kin nang lah ban pyntyllun ïa ka kam ha ka tipbriew tip Blei, u la ai ruh ka jingkyrkhu kyrdoh ba ki kam ki jam kin roi kin man bha ha kaba ïadei bad ki kam khaïi bad ka sorkar Bangladesh.
U bah Thomas Nongtdu, uba dei uwei na ki nong saiñdur ba seng ïa katei ka Assoctation, uba la long ruh kum u kongsan ha kane ka sngi, u la ai ka jingkhublei kitbok kitrwiang ïa ka seng , u la kyntu ïa ki paidbah khamtam kito kiba na ki thaiñ khappud ba ki dei ban long kiba kylluid mynsiem ban ai ïa ki jaka ki puta lada donkam namar kane ka dei na ka bynta ka bha ka miat jong ki khun ki kti ha ka lawei bad ka roi ka kiew jong ka thaiñ.
U Secretary jong ka Meghalaya Steering Committee, u bah H.Jana, u la pynpaw ka jingsngew kmen bad ong ba kane ka dei ka lad ban ïoh kamai ban im ja ki briew bad na ka liang ka Meghalaya Steering Committee (minor- Minerals)-Mining Licence Holder ruh ka long la kloi ban ai ka jingaitreilang bad ong ruh ba ka dei ban don ruh ka jingiatreilang bad ki trai shnong ban pynurlong, kane ka export na Kuliang sha ki ïew khappud ba ka dei ban ïaid shakhmat.
U President jong ka East Jaiñtia Mineral, Supplier, Exporters and Importer Association, u bah Wanshwa Nongtdu, u la pynsngew bad ong ba ïa ka jing khaïi Dry Port lah ban plie noh ha u bnai kyllalyngkot ne ha u bani rymphang,. Da ka jingsngew kmen u la iathuh ba napdeng ki 80 tylli ki district ka East Jaintia Hills District ka la shah jied ban sdang noh ïa ka SCS bad ka LCS ha kaba ka SCS kan long ha ka shnong khappud ha Huroi. Kiba la ai jingkren ki kynthup ruh u MLA ba rim, u bah Justine Dkhar, u bah Spindro Dkhar, u bah Tiberious Shylla, u bah Ioanis Shylla, u bah David Dkhar bad kiwei kiwei.