Jowai, Nailar 28 : Kawei na ki seng jong ki longkmie ka Hynñiewtrep Women Welfare & Development Organization (HWW&DO) lyngba ka President rangbah ka kong O.Suchiang bad ka Secretary kong B.D Lyngdoh ki ai ka jingkyrshan ba pura ïa ka jingthmu jong ka seng ki nong kamai kali, ka All Jaiñtia Commercial Vehicle Association ban pynlong da ka rally ne ka jingïaid paidbah ban dawa na ka sorkar ban set phatok shi jingim ïa ki to ki nongpynïap briew.
Ka seng ka phah ruh ïa kane ka khubor sngewlem sha ka ïing jong ki to ki drivers ki ba shah rahbor bad shah pynïap ha ki to ki riew runar ki bym don shuh ka mynsiem briew.
Ka seng ka pynrem jur ïa kine ki jingthaw ki ba pynïap dusmon ïa ki mynsiem ba lui lui. Ka seng ka dawa jur na ka sorkar ba dei ban pynshitom ïa kine ki riew thrang snam da ka ba tyngeh, da ka ba set phatok ïa ki shi jingim. Lada kum kine ki riew khlaw ki ïoh ban im lait luit kan buh ïa ka shnong ka thaw ha ka jingma ka bakhraw bad kan long ruh ka jingsyier mynsiem ïa ki kynthei khynnah bad wat ïa ki riew rangbah ruh.
Shuh shuh ka seng ka ai mynsiem ïa kiba ha ïing ha sem jong ki to ki drivers ki ba shah pynïap, ka seng kan ïa treilang haduh ban da jop bad ban pynduh jait syndon ïa kum kine ki riew bymman nongpynïap briew.
