Pynliem ka SK Living FC ïa ka Ri Bhoi United FC ha ka phainal ka 14th ha Mawlasnai

Nongpoh, Naiwieng 10 : Hadien ka jingïaid shaphrang jong ka lympung ïalehkai phutbol bala tip kum ka 14th Independence Day Cup 2022 bala pynlong da ka Mawlasnai Social & Cultural Sports Clubs, katei ka lympung kala poi noh sha kaba kut mynta ka 10 tarik Naiwieng hadien ka jingïakhun phainal hapdeng ka Ri bhoi United FC pyrshah ïaka SK Living FC bala pynlong ha madan ïalehkai Mawlasnai.
Ïa katei ka lympung la wan ban pynhap pyrda noh da u Dr CJK Warjri BDO ka Bhoirymbong C&RD Block kum u kongsan haka jingdon lang u Bah Shemphang Lyngdoh kum u symbud kongsan, ki nongïalam jong ka Mawlasnai Social & Cultural Sports Club bad kiwei kiwei ki riew rangbah.
Haba phai sha ka jingïakhun phainal ha katei ka sngi hapdeng ka Ri Bhoi United FC pyrshah ïaka SK Living FC ka jingïalehkai kala long kaba itynnad bad shongshit bala wan ruh ban sakhi da ki hajar ngut ki paidbah nongkyrshan, bad naduh ba sdang ka kylla step ka jingïakhun kala long kaba ïakhaid khlem don ba ioh pynkhih ïaka jar.
Haba phai sha ka kylla miet jong ka jingïalehkai kala nang kham khluid bad dei haka minit ba 48 ka SK Living FC kala ioh ban pynkhih nyngkong ïaka jar bad haduh ba kut ka kylla miet ka Ri Bhoi United Fc kam shym la lah shun ban pynphai ïa katei ka shi kol kaba la bang pura syndon ïaka SK Living FC ban rah ïaka nam lahduh jong katei ka lympung.
Naka liang ka MS&CC kala sam ruh ïaki khusnam ha katei ka sngi ha kaba ka SK Living FC kala ioh ban rah ïaka song pisa kaba 1.20 lakh ryngkat ka trophy bad ka Ri Bhoi United FC kala rah ïaka song pisa kaba 60 hajar ryngkat ka trophy.