Kolkata, Ïaiong 04 : Ka kynhun ïalehkai jong ka Shillong Lajong ka la ïoh ban pynliem noh da tang 1-0 kol ïa ka kynhun jong ka East Bengal FC ha ka lympung jong ka Hero 2nd Division League 2022-23 kaba long ha kane ka sngi Ba-ar ha Naihati Stadium, West Bengal.
Ïa katei ka kol jop na ka bynta ka kynhun hapoh ka jingïalam jong u Bah Bobby Lyngdoh Nongbet la ïoh ban thep da u Pursunep ha ka minit kaba 50 jong ka kylla miet hadien ba ka jingïakhun ha ka kylla step ka la kut noh khlem da don mano mano ruh ba ïoh thep kol ha ka kylla step.
Watla naka liang ka East Bengal kala ïakhun tyngeh ban ïoh pynïakhaid hynrei tad haduh ban da kut ka por ïalehkai ruh kam shym la lah satia ban pynkhih jar.
Kumta na katei ka kol jong u Pursunep ka la pynlong ïa ka Shillong Lajong ban mad ïa ka jingjop ba nyngkong ha katei ka lympung ban khur ïa ki lai point na ka Group B. Kane ka kynhun mynta ka don ha ka kyrdan kaba ar hadien ka United Sports Club watla ki don katjuh ka jingïoh khur point hynrei ka ïapher pat ha ka jingïoh thep kol.
Ka jingïakhun kaba bud na bynta ka Shillong Lajong kan dei pyrshah ïa ka BLG – The Diamond Rock FC ha ka 09tarik mynta u bnai hi ha Mulna Football Stadium bad kaba bud pat kan dei ia ka United SC ha ka 14tarik jong mynta u bnai hi.
