Shillong, Nailar 04: Ka jingïakhun kaba itynnad ha ka kylla step ka la pynlong ïa ka Sawmer ba kan mad ïa ka jingjop kaba da 2-1 pyrshah ïa ka Rangdajied United ha ka Shillong Premier League 2026 hynne ka sngi Ba-ar ha madan First Ground SSA Stadium.
U Oresterwell Langshiang (18’) bad u Wanshanlang Dkhar (36’) ki la thep ïa ki ar tylli ki kol ba kongsan na ka bynta ka Sawmer katba u Pasborlang Khonglikong (24’) u la thep ïa ka shi kol jong ka Rangdajied United.
Shuwa kane ka jingïakhun, ka Rangdajied ka la ïakhaid mar 1-1 bad ka Meghalaya Police ha ka taïew ba ladep, katba ka Sawmer ka la shah rem da 1-0 hakhmat ka Langsning kaba bat ïa ka nam lahduh, ha ka jingïalehkai ba sdang jong ka samoi.
Baroh ar liang ki la wanrah jingkylla ïa ka kynhun ba sdang jong ki na ka bynta kane ka jingïalehkai. Na ka bynta ka Sawmer u Andy Z Mawthoh u la sdang ha jaka jong u Bickyson Kharkongor, katba ka Rangdajied ka la pynkylla ar ngut – u Ronald Kharkongor bad u Khainkupar Iawphniaw ki la sdang ha ka jaka jong u Mebannangkiew Thabah bad u Mebatskhem L Lyngkhoi.
Ki la don katto katne ki jingpyrshang kiba la jan seisoh mar ïa sdang ka jingïalehkai na ka Rangdajied, ha kaba u Balamlynti Khongjee u la pyrshang ban shut kham jam ïa ka bol sha u rangap-kol ka Sawmer u Pyrshangbanbha Dkhar, kumjuh ruh ka Sawmer ka la ïoh ban pashat ïa ka bol kaba thikna lyngba u Banteilang Lyngdoh hynrei la shah pynkiar noh na ka jingma da u rangap kol ka Rangdajied u Meshan Banjop Sumer.
Hadien katto katne por ka Sawmer ka la ïoh ba kan lamkhmat na ka kol jong u Oresterwell ha ka minit kaba 18, hynrei ym slem tang hadien 6 minit, ka Rangdajied United FC ka la ïoh ïa ka kabu ban pynïakhaid noh lyngba u Pasborlang (24).
Ka Sawmer ka la ïoh ban kam biang ïa ka kol lamkhmat jong ka ha ka minit kaba 36 lyngba u Wanshanlang, kaba la rai artad ïa ka jingjop bad ban khur pura ïa ki lai point, watla ka Rangdajied ka la ïaleh katba lah ban pynkhlaiñ ha ka kylla miet.
Ka jingïakhun ha kane ka sngi Balang kan long hapdeng ka Mylliem SC pyrshah ïa ka Laitkor SC, kaban long ha ka por 4 baje nohphai sngi.
Baroh ar kin rung sha kane ka jingïakhun hadien ba shah rem ha ki jingïalehkai ba sdang. Ka Mylliem SC ka la shu shah rem salit da 1-0 hakhmat ka Nongkseh SSCC katba na ka liang ka Laitkor SC pat ka la rem kput haduh 5-0 hakhmat ka Mawlai SC.
Kumta kane ka jingïakhun kan long ka kabu ïa baroh arliang, namar kin donkam ban khur ïa ki nam jop kum shi bynta ban ïai don ha ka thong ban lah ban jam shakhmat ha kane ka samoi ïalehkai ba mynta ka SPL.
