Shillong, Nailar 04: Ka Valley View Secondary School ha ka sngi Baar (04 tarik Nailar, 2026) ka la pynkup burom ïa ki khynnah ïalehkai Judo jong ka hadien ba ki la wanrah nam da kaba pyndep ha ka kyrdan ba-ar lane First Runners-up ha ka Inter-School East Khasi Hills District Judo Championship 2026 da kaba khur haduh 23 tylli ki takma.
Kum ka jingai mynsiem ka skul ka la pynlong ïa ka jingïalang pynkup burom ha skul ha ka jingdonlang ka Principal, Kong E. Phira, ka Assistant Principal Kong A. Warjri, ka Nonghikai Judo Teacher Miss Phiyona Nongbet, u Coach Gibil G. Momin, ryngkat bad ki nonghikai bad ki samla pule.
Haba pdiang sngewbha ïa ki nongjop, ka Miss A. Warjri ka la ai jingïaroh ïa ki samla kiba la wanrah nam ïa ka skul, da kaba bynrap ba ka jingjop jong ki ka dei u soh jong ka jingtrei shitom, ka jinglong ryntih bad ka jingminot.
Haba phai sha ka Championship, la pynlong ïa ka da ka East Khasi Hills Judo Association ha Mawpat Multipurpose Hall naduh ka 31 tarik Naitung haduh ka 01 tarik Nailar.
Ki nongïalehkai ka Valley View Secondary School ki la khur haduh 23 tylli ki takma, kynthup ïa 5 tylli ki takma ksiar, 7 tylli ki rupa bad 11 tylli ki rnong, kaba pynpaw ïa ka jinglah jong ka skul ban kyntiew ïa ka kam ïalehkai bad ban pynmih ïa ki samla kiba don sap.
Kiba jop takma ksiar:
Sahil Singh, Smalamok T. Sangma, Dev Basumatary, Mewanbanshan Nongsiej bad Anu Kumari.
Kiba jop takma Rupa:
Sajid Ali, Amdon Kumar, Cynthia Riahtam, Shinali Koch, Stephenson Lyngdoh, Jarrett Felix Lyngkhoi bad Hamebanshan Nongsiej.
Kiba jop takma rnong:
Amdon Das, Harshit Singh, Kunal Sharma, Sohani Kumari, Anjaan Basumatary, Sanjana Rai, Pratik Paul, Sanjay Rai, Salgit R. Marak, Sandhya Kumari bad Banisha Warjri.
Kane ka jingjop ka pyni ïa ka jingaiti lut jong ki nongïalehkai, ki coach, ki nonghikai bad ka jingïalam jong ka skul ha kaba pynroi ïa ka kam ïalehkai.
La khmih lynti ba kane ka jingïoh jingïaroh kan long ka mynsiem jingïakhih ïa shibun kiwei pat ki samla pule ban shim bynta ha ka Judo bad ban trei shitom na ka bynta ki jingïakhun ban sa wan.
