Shillong, Rymphang 17 : Ka lympung ïalehkai kriket ba la pynïaid da ka East Khasi Hills Cricket Association (EKHCA) ka dang ïaid shaphrang haduh ka sngi Thohdieng ha kaba la ïoh ban pynïalehkai saw tylli ki team.
Ka Nongdawah CC ka la khur jingjop da kaba pynliem da 44 ron ïa ka Laitjem CC bad ka Sohra Combine CC ka la pynliem da 5 wicket pyrshah ïa ka Cricket Smit.
Ha ka jingïalehkai ba nyngkong, ka Nong-dawah CC ka la kam ban tied nyngkong hadien ba ka la jop ïa ka jingkynting pisa bad buh ïa ka thong da 105 ron khyllem noh 10 wicket ha ki 18.4 over. U Bhaboklang Nongpluh u kamai 26 ron na ki 23 bol bad u Mebanshan Kharsati u ïoh 2 wicket ai kamai 17 ron ha ki 4 over na ka bynta ka Laitjem CC.
Haba poi ha ka pali tied, ka Laitjem CC kam lah ban tied ïa ki bol ba kawang da ki rangïalehkai ka Nongdawah ha kaba ka la khyllem noh 10 wicket ha ki 16.5 over bad kamai tang 61 ron. Tang u Marken B Kharkongor u ïoh ban kamai 22 ron na ki 21 bol bad u Nangshai Nongpluh u ïoh khur haduh 5 wicket marwei ai kamai 18 ron ha ki 3.5 over bad ïoh ruh ïa ka khusnam Player of The Match.
Ha ka jingïalehkai kaba ar, ka Cricket Smit kaba la jop ïa ka jingkynting pisa ka la kam trai ban tied nyngkong bad kamai 127 duh noh 6 wicket ha baroh ki 20 over bad u Shankupar Kharbyngar u kamai 45 ron na ki 35 bol katba u Shanborlang Kharshiing u ïoh 2 wicket ai kamai 10 ron ha ki 4 over na ka bynta ka Sohra Combine.
Ka Sohra Combine haba beh ïa katei ka thong ka la lah ban pyndep tang ha ki 15.5 over bad duh noh 5 wicket ha kaba u Mangkara Diengdoh marwei u khyrwit ïa ka shiteng spah ron (64) na ki 31 bol uba la jop ruh ïa ka khusnam Player of the Match katba u Raymond Thabah u ïoh 2 wicket ai kamai 25 ron ha ki 3.5 over.
