Shillong, Rymphang 17 : Ka tnad badei khmih ïa ki kam ïalehkai ka Directorate of Sports Aand Youth Affairs ha ka sngi Thohdieng ka la pynkup burom ïa ki nongïalehkai phutbol bad ïa u samla Pynshngaiñ Kurbah kiba la khur takma na ka Khelo India Youth Games kaba dei jong ka samoi 2020-21 bad 21-22.
Ïa kine ki nongïalehkai la pynkup burom da u Bah DP Wahlang IAS, uba dei u Chief Secretary jong ka jylla kum u kongsan ha State Convention Centre, Shillong ha ka jingïadonlang ki ophisar ka tnad pynïaid ïalehkai, ki nongkitkam ka Meghalaya State Olympic Association (MSOA), nongkitkam jong ki synjuk pynïaid ïalehkai kiba pher bapher bad kiwei kiwei kiba la shah khot sngewbha.
Ki nongïalehkai kiba la shah pynkup burom ki kynthup ka kynhun ïalehkai phutbol jong ki shynrang kiba la wanrah ïa ka takma Rnong na ka lympung ïalehkai Khelo India Youth Games 2021-22 kaba long ha Panchkula, Haryana naduh ka 4 tarik haduh ka 13 tarik Jylliew 2022, nangta ïa ka kynhun ïalehkai phutbol kiba la wanrah ïa kajuh ka takma Rnong na ka Khelo India Youth Games 2022-23 kaba la pynlong ha Madhya Pradesh naduh ka 30 tarik Kyllalyngkot haduh ka 11 tarik Rymphang 2023.
Ka Jylla Meghalaya ha ka Khelo India Youth Games 2023 kaba dang shu kut shen ha Madhya Pradesh ka la ïoh ruh ïa ka takma Rupa kaba nyngkong eh ha ka jingïalehkai ïakob kieng lieng (kayaking) kata lyngba u samla Pynshngaiñ Kurbah ha kaba ha kane kajuh ka sngi ka tnad sport ka la pynkup burom ha ryngkat u Ian Vincent uba dei u coach bad ka Sheela Vincent kaba dei ka manager.
U Bah DP Wahlang, IAS Chief Secretary haba kren kum u kongsan u la ai khublei ïa ki nongïalehkai kiba la wanrah nam bad burom ïa ka jylla na kitei ki lympung ïalehkai bad kitbok kitrwiang ba kin dang trei shitom shuh shuh khnang ba kin nang lah ban ïalehkai bha bad ban khur ïa ka jingjop.
U la pynpaw ruh ka jingsngewkmen khamtam ha ka liang ka jingïalehkai kieng lieng ba ka jylla kam ju mutdur mynno mynno ruh hynrei ha ka Khelo India Youth Games kaba dang shu dep shen, u samla Pynshngaiñ Kurbah u la jop ïa ka takma Rupa.
U la kyntu ïa ki nongïalehkai ba kim dei ban mlien ha kiba sniew hynrei kum ki nongïalehkai kidei ban kiar na kiba kum kita bad ba kin pynmlien ban thiah dang kloi bad khie dang step ban kilan met khnang ba kin ïoh ka met ba koit ba khiah bad kaba khlaiñ.
U la ai mynsiem ruh na ka bynta kito kiym shym la jop ha kine ki ar tylli ki jingïalehkai ba kin dang ïai trei shitom khnang ba ha kawei ka sngi kin ïoh ban poi sha ka thong jong ka jingjop kaban long ka jingsarong ïa ka jylla, ïa ka ïing ka sem bad ïalade ruh.
