Pynkynriah noh ïa ka kam nonghikai SSA sha ka tnad Education ka jylla, dawa ka MSSASA

Shillong, Lber 04 : Ka kynhun jong ki nonghikai SSA hapoh ka lama jong ka Meghalaya SSA Schools’ Association (MSSASA) ha ka sngi Nyngkong ka la bteng biang ïa ka jingdawa ba dei ban thaw ïa ki post bad pynkynrïah noh ïa ki 12,541 tylli ki kam nonghikai SSA na ka State Implementation Society sha ka State Education Department katkum ki kyndon jong ka RTE/SSA.
Halor kane, ka kynhun ka la leit ruh ban kynduh ïa u State Project Director Samagra Shiksha u Swapnil Tembe ban pyndap ïa kitei ki kam nonghikai ba lait ha ki skul lower primary bad upper primary. Na ka liang u President ka MSSASA, u Bah Aristotle C Rymbai u la ong ba ka association ka la dep phah ruh ïa ka jingthoh sha u chairpersno ka state education commission ha ka 01tarik Risaw 2023 ban thaw ïa ki post bad pynkynriah noh ïa ki 12,541 tylli ki kam nonghikai SSA na ka State Implementing Society sha ka State Education Department katkum ki kyndon ka RTE/SSA.
La ïathuh ba na ki 12541 tylli ki nonghikai SSA, 5814 tylli ki dei ki nonghikai ha ki lower primary bad 6727 tylli pat ki dei ki nonghikai Upper Primary kiba trei hapoh ka mangtyngka jong ka Samagra Shiksha Abhiyan ba tip mynshwa kum ka Sarva Shiksha Abhiyan.
U la ong ba na ka liang u Member Secretary ka Commission u Ambrose Ch Marak u la pyntip ba ka Commission ka la ïoh pdiang ïa ka jingthoh na ki bad mynta ïa kane la phah pat sha ka sub committee ban bishar bniah.
“Kumta, ngi kyrpad ïa baroh ki nonghikai SSA ba kin ai ka jingïatrei lang bad ka association naba ka jingïakren bad ka sorkar ka dang ïaid,” u la ong.
Katkum ka jingïathuh jong u haba ïadei bad ki kam nonghikai kiba lait, la ong ba ki don 22 tylli ha ki lower primary bad 89 tylli pat ha ki skul upper primary.