Ïoh ki nongsaid aiñ da ka shlem treikam ba shipor hajan High Court hadien ba pluh ka SBA

Shillong, Lber 04 : Ki nongïasaid aiñ kiba hapoh ka shatri jong ka Shillong Bar Association ki la ïoh ïa ka Shlem treikam ba shipor kaba don markhap bad ka ïing bishar ba don burom ka Meghalaya High Court.
U nongthoh khubor haba ïoh ban ïakren bad u Bah T. L. Jyrwa Secretary ka Shillong Bar Association hynne ka sngi Nyngkong ka 4 tarik Lber 2024 hapoh ka kamra treikam kaba shipor, u la ïathuh ba ka High Court ka ai ia katei ka shlem treikam tang na ka bynta hynriew bnai.
U Bah T. L. Jyrwa u la ïathuh ba hadien ka jingshah bam duh ka ophis treikam kaba don hajan ka DC ophis, na ka liang ka Association ka la pynlong ka jingïakynduh kaba kyrkieh bad kyrpad ïa ki bor badei peit ban ai ïa ka shlem treikam khnang ba ki nongïasaid aiñ kin ïoh ban pyndonkam ban pynïaid shaphrang ïa ki kam.
U la pynpaw ka jingai khublei bad sngew nguh ïa ka Meghalaya High court, Myntri ka tnad aiñ bad ïa u Myntri Rangbah ka Jylla u Conrad K Sangma kiba la sngewthuh ïa ka jingeh jong ki nongïasaid aiñ kiba la duh noh ïa ka ophis bad khamtam ïa ki kot ki sla ha kaba ki la ai ïa katei ka shlem treikam kaba shipor.
Kumba la sngewthuh ban ïoh ïa ka shlem treikam kaba thymmai kan dang kham shim por, kumta u Bah T.L. Jyrwa u buh ka jingkyrpad ïa ka High Court ba lada kut ki 6 bnai kan kham pynjlan shuh ïa ka por namar kam dei kaba suk ïa ki ban pynïaid shaphrang ïa ki kam ki jam lada khlem ka shlem treikam.
U la ïathuh ba ka ki dkhot kiba la pynrung kyrteng ïalade bad ka Shillong Bar Association ki don 12 spah ngut tam.
Kum ban pynkynmaw hangne ba ha ka miet jong ka 24 tarik Rymphang 2024 ka ding kaba klang ka la bam duh ïa ka Shillong Bar Association kaba la wanrah ka jingduh kaba khraw ïa ki nongïasaid aiñ ba ki kot ki sla ki la ing lut.