Shillong, Nohprah, 02: Ka ophis jong ka Commissioner for Persons with Disabilities ka Sorkar Jylla ryngkat ka jingïatreilang bad ka ophis State Resource Centre on Disability Affairs, Shillong, ka la pyntip ba ka jingrakhe ïa ka sngi kyrpang jong ki briew kiba don jingduna ha ki dkhotmet la pynkynriah sha ka 4 tarik, Nohprah.
“Ngi la pynkynriah ïa kane ka sngi, namarba ka 3 tarik, Nohprah ka hap ha ka sngi u Blei,” la ong ka Assistant Commissioner for Persons with Disabilities ka Kong Bridget Warshong ha ka jingïakren bad ki lad pathai khubor ha ka sngi Saitjaiñ.
Mynta u snem, ka jingrakhe ïa kane ka sngi kyrpang jong ki briew kiba don jingduna ha ki dkhotmet lane ka ‘International Day of Persons with Disabilities, 2023’ kan long halor ka phang, “A Day For All”. Ka jingrakhe kan sa long ha U Soso Tham Auditorium naduh ka 10:30 baje mynstep.
Ka Kong Warshong ka la ong ba ka jingpynlong ïa kane ka jingrakhe ka long ban pynsngewthuh paidbah ha kaba ïadei bad ka hok bad ka bha ka mïat jong ki briew kiba don jingduna ha ki dkhot met katkum ba hok ba la bsuh hapoh ka Rights of Persons With Disabilities Act, 2016 ha kaba kane ka aiñ ka kren shai ïa ka jingkynthup lang ïa ki briew kiba duna ha ki dkhotmet hapoh ka imlang ka sahlang.
“Ka thong jong kane ka prokram ka long ban kynthup lang ïa ki briew kiba duna dkhotmet da kaba ailad ba kin pyni ïa ka sap ka phong kaba ki don bad ka jinglah ka jong ki,” la ong ka Kong Warshong.
U State Resource Centre on Disability Affairs Bah Dylan Syiem, u la bynrap ba kane ka dei ka sien banyngkong eh ba yn pynlong ïa kane ka prokram na ka bynta ki briew kiba duna ha ki dkhotmet ha ka rukom ka jingïalehkmen.
