Ha Shnong ngim ju shah shuh ban song jingsong da ki plastik: RS Moolamylliang

Shillong, Nohprah 02: Ka Shnong Mollamylliang, ha East Jaiñtia Hills dang shen ka la shah jied kum ka Shnong ba khuid tam ha ka Conference jong ki 45 tylli ki ri ka pyrthei kaba la long ha Mumbai. Ïa kane ka khusnam la ai da ka International Society of Waste Management, Air and Water.
Ka kyrteng jong ka Award ka long IconSWM- CE Excellence Award 2023.
U Rangbah Shnong ka Moolamylliang, u Bah Apmon Pachiang, uba dang don mynta ka Mumbai ban leit ïashim bynta ha kane ka Conference bad leit pdiang ruh ïa ka Award, u la ong ba kane ka khusnam kaba ka Shnong ka la ïoh kan ai mynsiem shibun ïa ka Shnong bad ïa ki paidbah nongshongshnong,namar ba kadei ka khusnam kaba heh bha jong ka ri India bad jong ka pyrthei hi baroh kawei. Haba batai khambha halor ka jingshah jied ban ïoh ïa kane ka khusnam, u Rangbah Shnong, u la ong ba kane ka Society ka la phah ïa ki briew jong ka ban wan peit ha Shnong naduh ka jingkhuid jingsuba, ka rukom bret ïa ki ñiut bad kiwei de ki jaboh, nangta ka jingpyndonkam ïa ki plastok, ka jingthung dieg ban pynjyrngam ia ka shnong bad kiwei kiwei.
U Bah Apmon, u la ïathuh ba ha Shnong jong u, ym ju shah shuh ban pyndonkam ïa ki Plastik bad wat ia ki kwai ruh la song da ki sla bad ym shah thep ha ki plastik. Nangta ki dukan ruh kim ai plastik shuh haba leit thied jingthied, hynrei kiba leit thied jingthied ki hap rah da ki pla na ïing. Ha kaba iadei bad ki ñiut ki ñer ne ki waste, ym shah ban shu bret kat haba lap, hynrei la buh da ki jaka kiba biang bad kiba lait na ki jaka paidbah. Wat ïa ki bilor ruh la bthah ïa ki paidbah ba kin sumar bha bad ym dei ban shu bret pathar. “Ngi la sumar bha na ka bynta ka jingkhuid jingsuba ka mariang”, la ong u Bah Pachiang.