Shillong, Ïaïong 17: Katkum ka jingpynbna ba la pynmih da Commissioner & Secretary jong ka sorkar jylla la ong ba ka sorkar ka la pynbna ïa ka jingai kyrteng bad kumjuh ruh ka jingpynthymmai ïa ki kyrteng ha shilynter jong ki surok kiba don ha ka jylla.
Katkum ka kyrwoh khubor la ong ba kane ka jingpynbna kan treikam noh mardor kumba la pynmih jingpynbna da ka tnat General Administration Department (B).
Katkum ki jingpynbna ki long ba ïa ka surok “Blessed Mother Teresa” la pynkylla noh sha ka kyrteng “Saint Teresa Road”, ïa ka “Rev Nichol’s Roy Road” la ai kyrteng thymmai kum ka “Rev. J.J.M Nichols Roy Road.”
Nangta ïa ka “PWD Road na Thorika Rabha shaduh Nibari” la pynkylla sha ka kyrteng “Utpal Rabha Road”. Ïa ka “Pasyih Garampani Road (P.G Road)” la ai noh da ka kyrteng thymmai da ka “Phramer-Shangpung-Saphai Road.”
Ki surok na ka shnong Wahthapbru ban leit sha Jaïaw Pdeng kaba ïaid lyngba jong ka Shnong Mission Compound la ai noh da ka kyrteng kaba thymmai kum ka “Dr. Friday Lyngdoh Road.”
Ka kyrwoh ka ong ba ïa kane ka jingpynbna la dep ban phah sha baroh ki bor kiba dei peit bad sha kiba dei ban phah na ka bynta ka jingtip bad ka jingdonkam ban shimkam.
