SHILLONG, Lber 15: Ka St. Dominic Savio’s Higher Secondary School Mawkhar, Shillong, ka la pynlong ïa ka 45th Annual School Sports ka Jong ka ha ki 3 sngi jong kane ka taïew, kata, ha ka 11, 12 bad 13 tarik u Lber 2025, ha madan student ne Student’s field.
La sdang ia kane ka lympung da ka jingkyntiew ïa ka lama jong ka skul myn ha ka 11 tarik, da u President jong ka School Managing Committee, Rev. Fr. Teiborlang Lyngdoh, Parish Priest ka St. Joseph’s Church, Mawkhar, uba la shim bynta Kum u Kongsan. La don ryngkat lang u rangbah J. A. Lyngdoh, Rev. Fr. Andreas Pariat uba dei u Principal ka skul, ki sisters kiba trei ha skul, ki nonghikai bad ki khynnah skul. Ha kitei ki lai sngi, lah don bun jait ki jingïalehkai kiba la pynkmen shibun ïa ki khynnah skul .
Ha ka sngi pynkut, kata ha ka 13 tarik, u rangbah shnong ka Mission Compound u Bah T. Rumnong u lah wan ban shim bynta Kum u kongsan, bad la don ryngkat lang ruh u rangbah D. War, secretary jong ka Mission Compound. U Bah T. Rumnong u lah ai jingkren kynti bad ai mynsiem ïa ki khynnah.
Hadien ka jing sam ïa ki khusnam sha ki nongjop ha ki events bapher bapher, u Kongsan, bah T. Rumnong, u la pynhiar noh ia ka lama ban pynkut ïa kane ka lympung ialehkai mynta ka snem.
