Nongstoiñ, Lber, 14: Ka jingshimkhia jong ki nongïalam ka All Meghalaya Comercial Truck Owner & Driver Association ïa ka jingkyrpad jong ka dorbar shnong Rwiang bad ki paitbah, ban ïarap lem halor ki jingeh ba ki ïakynduh na ka jingdon jong ka karkhana saiñ nar kaba la tip kum ka Shakambari Ferroalloys Private Limited, ka la long kaba jop namar ki nongpynïaid jong katei ka karkhana ha ka sngi palei jong ka taiew, ki la hap ban pyndem tdong da kaba khang noh ïa katei ka karkhana ha ka por ba ki nongïalam jong ka AMCTO&DA ha ka jingdon lang jong u bah John Ïawphniaw sordar shnong ryngkat bad ki paitbah ki la hiar ban kren bad ki nongpynïaid jong ka karkhana.
Ha katei ka sngi ki paitbah bad ki nongïalam ka AMCTO&DA, ki la hiar ban bishar bniah ïa ka jingpyntuid ïa ka jaboh kaba mih na katei ka karkhana sha ka wah Rwiang kaba don ha syndah eh, ha kaba ki la lap ba ïa katei ka jaboh la pyntuid laitlan baroh shi snem lynter sha ka wah khlem da don kino kino ki jingïadaba paka.
Nalor kata la leit ban jurip ruh ïa ki jaka sah jong ki nongtrei ha kaba la lap ba kitei ki jaka sah kim don jingïapher ei ei ruh na ki sem sniang bad ka jing jaboh ki sawdong saw kun da ka jingbret pathar ïa ki palstik bad ki bilor ka la long shaba palat.
Hadien ka jingleit jurip u sordar jong ka shnong bad ki paitbah kynthei bad shynrang ki la ïathuh lut ïa baroh ki jingeh ba ki ïakynduh, namar ka jingshah ktah jong ka mariang, ka jingkoit jingkhiah bad ka jingbym kheiñ snep jong ki nongpynïaid katei ka karkhana ïa ki paitbah nong shnong shnong.
Nalor kata ki la ong ruh ba ka jingleh meng jong ki ka long ba wat ïa ka lynti shnong kaba ki briew ki leit trei leit ktah ruh ki la khang da ka khyrdop. Hynrei ha katei hi ka miet ki nongpynïaid ka karkhana ki la hap ban phah ot noh da ka mashin ïa katei ka khyrdop bad phah wan da ka puh shilum ban weng ïa ki maw kiba heh kiba ka la phah khang lynti.
Ha kaba ïadei bad ka jinglong jingman jong katei ka karkhana saiñ nar ha Rwiang, u bah Mosklandar Marngar president ka AMCTO&DA haba ïakren bad ki nongthoh khubor, u la ong ba ka long kaba lyngngoh haduh katta katta ba kum uwei u rangbah u ba la ai jingkren ha ka sngi ba ka sorkar ka pynlong ïa ka jingpynsngew paitbah, ha shuwa ban ai jingbit ïa katei ka karkhana, um shym poi pyrkhat ba ka jingthmu ban wan seng ïa katei ka karkhana, ka long tang ban ai jingmyntoi ïa ki trai karkhana bad ïa ki katto katne ngut ki khwan myntoi shimet hynrei kan pynjynjar pat ïa ki paitbah.
U la ong ruh ba kaba kham lyngngoh shuh shuh ka long namar ba ki nongpynïaid katei ka karkhana, ki la pynkheiñ lut ïa ki kyndon ba la bthah da ka Ministry of Fotrest & Environmernt jong ka sorkar pdeng bad jong ka sorkar jylla.
Nalor kata u la ong ba ym lah ban len ba ki don ki nong shnong shnong kiba leit ban pynhap mar ha katei ka karkhana kum ïa u mawleiñ, rnga, dewïong bad kiwei kiwei kiba ïoh ban kamai ban kyrshan ïa ka ïing ka sem jong ki. Hynrei ban ïoh jingmyntoi tang ki katto katne ngut hynrei ki paitbah jong katei ka shnong bad ki shnong ba marjan kin im jynjar, ki dap ram haduh khlieh na ka bynta ka jingphah sumar ïa ki jingpang jingshitom ba ki ïoh na ka jaboh jong ka lyer kaba ki ring mynsiem kaba mih na ka tdem jong katei ka karkhana baroh arphewsaw kynta khlem sangeh kam don jingmut satia.
Kumta na ka bynta ka jingmyntoi jong ki paitbah lyngba ka jingkoit jingkhiah bad ka jigkhuid jingsuna jong ka mariang bad ki sawdong sawkun, ka kham bha ba katei ka karkhana kan khang khyrdep shi syndon, katba kam pat lah ban pynbiang lut ïa ki jingdon kam kuba la bthah da ka sorkar lyngba ki kyndon shuwa ban ai jingbit ba kan trei.
