Shillong, Nailar 13: Ka Shillong Sports Association ryngkat bad ka Shillong Referees Society, hynnin ka Sngi Saitjaiñ jong ka taïew ba ladep, ka la ïoh ban pynkut noh ïa ka AIFF Referees Development Course ïa kaba ki la pynlong haduh san sngi lynter naduh ka 9 tarik, Nailar.
Kumban shu pynkynmaw, ïa kane ka prokram ai jinghikai ban pyntbit ïa ki referee jong ka jylla, la wan ban pynïaid da u Pijush Biswas, u ba dei u AIFF Referees Instructor, ryngkat ka jingïashimbynta ban iarap lang da ki dkhot jong ka National Referee kiba kynthup ïa u Bah Ricky M. Synnah bad u Bah Kynsanphar L. Nongum ha ka sngi sdang ïa kane ka prokram, bad ki la don haduh 47 ngut kiba la wan ban ïashimbynta ha kane ka prokram pyntbit, kiba kynthup ïa 12 ngut ki kynthei bad 35 ngut ki shynrang.
Ha kane ka sngi ba khadduh jong kane ka Referees Development Course, la ïoh ban sdang naduh ka por 6.30 baje mynstep da kaba pynlong ïa ka jingkilanmet (fitness test) ha SAI, NEHU Campus bud pat sa ka jingthoh exam ha ka por 11 baje mynsngi.
La pynhap pyrda noh ïa kane da u Bah Dipshon Lyngdoh Nongbri SSA (Assistant General Secretary Cum Convener SSA, Referees Committee) ha ka por 3 baje nohphaisngi.
Shuwa kane la ïoh ka jingïasyllok (feed back) na ki Referees Kynthei bad Shynrang, ha kaba u Sir Pijush Biswas, AIFF Referees Instructor u da ïaroh ïa kiba la wan ban ïashim bynta khamtam ïa ki nongshimti ban pyniaid ïa kane ka prokram ha Shillong, da kaba ong, “Kane ka long ka khubor ba bha bad ruh ka jingkyrmen ïa ka Lawei ki nongpyniaid phutbol bad ruh ban kyntiew shaphrang ha ki kyrdan ba kham shalor ïa ka kam Referee”.
