Shillong, Risaw 19: U Myntri Rangbah ka jylla u Conrad K Sangma, ha ka sngi Balang u la pynkup burom ïa laingut napdeng ki san ngut kiba ki nongjop na ki District bapher ïa ka Aspire Meghalaya District Talents Events 2022 ha ka jingïalang kaba long ha Soso Tham Auditorium, Shillong.
Haba ai jingkren u Myntri Rangbah u la ïathuh ba dang shen u Myntri khynnah ba peit ïa ka Pule puthi jong ka sorkar pdeng u la kylli bniah shaphang ka Aspire bad u kwah ruh ba ha ka jingïalang baroh ki myntri ki sorkar jylla ki la wan shim bynta ba na ka liang jong ngi batai bad kren shaphang kane ka Aspire khnang ba kan long ka model ha ka ri.
“Ngin sa ïohi ïa kiei kiei kiba kham bha ka jingshaniah ha lade kumba ngim pat ju ïohi mynno mynno ruh hynrei kaba donkam ka long ban minot bad ban ïatreilang,” u la ong.
Shuh shuh u la ong ba ha kane ka juk ka dei ka juk hap ïakop “Ka Reservation Policy ka don na ka bynta ka jong ngi hynrei kam mut pat ba ka rukom pyrkhat jong ngi kadei ban pyrkhat beit tang shaphang ka Reservation Policy hynrei ka dei ban long ka rukom pyrkhat ban don ïa ka mynsiem ban ïaleh. Ïakhun kum uta uba donkam ban im, ïakhun kum uta u bym don ïa ka jingbhah kyrpang, ïakhun lada hap ban ïakop bad kiwei pat kiba kham tbit ha ka pyrthei. Ka dei da kane ka rukom pyrkhat kaba nga kwah ba don ha man la uwei pa uwei u samla ka jylla” u la bynrap.
U la ong ba ka Aspire Meghalaya ka dei ka rynsan ban pyni sap, ban pdiang ïalade bad ban tei ïalade lyngba ka jingïoh ïa ka jinghikai bad jingbtin lynti bad ïa mynta hi, yn ym lah ban ïohi ïa u soh jong katei ka prokram hynrei ha ki 10 snem ban wan.
Ka East Khasi Hills chapter jong ka Aspire la pynlong ha U Soso Tham Auditorium, Shillong ha kaba 26 ngut ki samla donsap na ki san tylli ki shlem ai jinghikai ki la wan ban shim bynta bad napdeng kine la jied ban pynkup burom ïa ki laingut kiba wan sha khmat tam.
Ha kane ka prokram ba shisngi u Myntri Rangbah u la pynkup burom ïa ki 103 tylli ki shlem ai jinghikai na ki district bapher bapher jong ka jylla namar ka jingïashim bynta ha ka Meghalaya Youth Survey 2022 bad ka Soft Skills Training hapoh ka Aspire Meghalaya.
Ka Aspire Meghalaya ka dei ka prokram jong ka Directorate of Sports & Youth Affairs, Government of Meghalaya, ba la kyrshan da ka State Education Mission Authority of Meghalaya (SEMAM-SSA) hapoh ka State’s Education Department. Ïa kane ka prokram la pyntrei da ka AVENUES, Shillong.
