Shillong, Jymmang 04 : U MLA ka Shillong South, Bah Sanbor Shullai ryngkat ka jingïatrei lang bad ka Raid Laban Sports Social and Cultural Organisation (RLSCCO), ha ka sngi Saitjaiñ ki la pynkup burom ïa ki 24 ngut ki heprit kiba la mihkhmat bad khur takma ïa ka jylla ha ka jingïakob kiew lum bad lum thah sha Arunachal Pradesh bad kumjuh ha ka Meghalaya Games kaba dang shu dep.
Kum ka jingithuh ïa kine ki heprit, na ka lïang u MLA ka Shillong South Bah Sanbor Shullai ryngkat bad u MDC ka thain Bah Ricky Shullai ki la ai da ki tiar ïalehkai ryngkat ka song pisa kum ka jingkyrshan ïa kine ki heprit ryngkat ïa ki nongïalam bad nonghikai jongka kynhun ha ka jingïalang kaba long ha Lumparing Indoor Sports Hall. Lah ban kdew hangne ba hapoh ka jingïalam jong u Bah Wallambok Lyngdoh bad Kong Malviancy Shabong, ka Meghalaya Sports Climbing and Mountainering Association kaba treikam na katei ka thain hi ka la sei bun bha ki heprit bad ki samla kiba tbit ha katei ka jait jingïalehkai.
Na ka liang u Bah Sanbor ula ïathuh ruh ba ïa ka jinglut ha katei ka pynkup burom kaba kot sha ka 2.10 lak tyngka la sei na ka Discretionary Grant jong u.
Ha ka jingleit aireng sha ka North East Zone Championship kaba long ha Arunachal Pradesh, ka kynhun ka la ïoh ruh ban khur takma ksiar, takma rupa bad kumjuh ki takma rnong.
