SHILLONG, Nailur 06: Kum shi bynta ban ainam ïa katto katne ki rang bad thei ïalehkai kiba la wanrah nam bad burom ïa ka jylla Meghalaya, ka Sorkar Jylla ha ka Sngi Thohdieng (06 tarik Naitung, 2024) ka la pynkupburom ïa san ngut ki nongïakhun kti (Arm wrestler) kiba la ïoh mihkhmat ïa ka India sha ka rynsan ïakhun kti kaba la tip da ka ‘World Arm Wrestling Championship 2024’ ba la long ha Moldova, bad ruh ïa u Samla Donbor Rumnong u rang ba rah namlahduh ha ka rynsan pyni-dohksah ha Philippines bad ïa u Samla Johny Nongrum – u rangïakhun MMA ba satar jong ka thaiñ.
Ïa kine ki 7 ngut ki nongïalehkai la pynkup burom da u Myntri Rangbah ka Jylla u Conrad K Sangma ha ka jingïalang ba la pynlong ha KJP Assembly Hall IGP, Shillong.
Lah ban kdew ba baroh san ngut ki nongïakhun kti ka jylla kiba la shah jied ban mihkhmat ïa ka ri sha katei ka rynsan ïakhun kti ‘World Arm Wrestling Championship 2024’ ha Moldova, ki la lah ban wanrah burom ym tang ïa ka jylla hynrei ïa ka ri baroh kawei hadien ba ki la khur jingjop ha ki kyrdan ïakhun ba ki ïashimbynta.
Kine ki nongïalehkai kiba la ïoh khur takma na katei ka rynsan ki kynthup ïa ka: Starina Jasain kaba la jop ar tylli ki takma (rupa ha ka kyrdan ïakhun Left hand Grand Master Women 60 Kg bad takma rnong ha ka Right hand Grand Master Women 60 Kg), ka Margaret Pathaw kaba la khur 2 tylli (rnong ha ka Left Hand Master Women 60 kg bad rupa ha ka Right Hand Master Women 60 Kg), ka Mihsngewbha Rymbai 2 tylli (rupa ha ka Left Hand Grand Master Women 80 Kg bad ruh ha ka Right Hand Grand Master Women 80 Kg), ka Senebi Syngkli kaba la jop ar tylli ki takma rnong ha ka Youth 55kg, u Hubert Paliar u ba la jop takma rnong ha ka Para Standing 60kg
Katba u Samla Donbor Rumnong u la jop nam lahduh ïa ka Mr.Asia Pacific Bodybuilding Championship 2024 ba la pynïaid da ka World Fitness Federation kaba la sdang naduh ka 31 tarik u Nailar haduh ka 2 tarik Nailur ha TIU Theatre, Makati City Philippines.
Ha kane ka sngi la ïadonlang u Myntri ka tnad ïalehkai ka jylla u Bah Shakliar Warjri, u President ka MSOA Bah John F Kharshiing, u MDC ka Malki Laitumkhrah Constituency u Bah Fantin J Lakadong lem kiwei kiwei de.
