Shillong, Nailur 06: Ka klob ïalehkai phutbol jong ka thaiñ- kata ka Rangdajied United FC ryngkat bad ka kynhun ba ïalehkai ha ka Indian Super League – ka Bengaluru FC ki la soi ïa ka jingïateh kular ha ka Sngi Palei (05 tarik Nailur, 2024) ha ryngkat ka jingthmu ban plie lad bad kyntiew ïa ki khynnah ïalehkai kiba donsap bad kumjuh na bynta ki coach ha Meghalaya.
ïa kane ka jingïateh soskular (memorandum of understanding) la soi ha Rangdajied Performance Centre kaba ha Pynthorbah hapdeng u President ka RUFC – u Bah Eugeneson Lyngdoh lem bad u Director of Football jong ka Bengaluru – u Darren Caldeira.
Lah ban kdew ba kane ka jingïatehlok ka la pynïatylli biang ïa u Eugene bad kane ka klob barim kaba u la mih madan ha ki por ba ladep, ha kaba u la ïalehkai saw samoi bad kane ka kynhun ba radbah.
Kane ka long ka lad ïa ki khynnah lehkai kiba don ïa ka sap ba kyrpang bad kiba don jingthmu ban dang kham pynjanai shuh ïalade ha ka kam ïalehkai. Kane ka jingïateh lok hapdeng ka Rangdajied bad ka Bengaluru kam shym la kut tang hangne (ban kyntiew ïa ka sap ki khynnah), hynrei ka kynthuplang ruh ïa ki jinghikai ban pyntbit ïa ki coach.
Ha kaba ïadei bad kane, na ka liang jong u Bah Eugene u la pynpaw, ba “Kane ka jingïatehlok bad ka Bengaluru FC ka long ka sienjam kaba kongsan na bynta ka klob bad kumjuh ruh ïa ka phutbol ha Meghalaya. Ngi sngewkmen shikatdei eh ban ïatreilang bad ka Bengaluru FC, kawei na ki klob phutbol ba khlaiñbor ha India. Ryngkatlang, Ngi thmu ban plie lad ïa ki khynnah ïalehkai bad ki coach ban kiew shaphrang, ban shah pyntbit, bad ba kin lah ban kynjoh sha ka sap ba pura ba maki ki don.”
“Ka Bengaluru ka la don shibun ki player kiba ka la pynmih lyngba ka prokram kyntiew sap ïalehkai jong ki khynnah samla bad ka don ïa ka jingïohi jngai ban wanrah jingkylla bad kyntiew ïa ka phutbol ha India”.
U la kdew ruh ba ka jylla Meghalaya ka duna bha ki coach kiba la pyndep ïa ka jingshah pyntbit (qualified coach), kumta ka donkam ïa kane ka lad lada ka kwah ban kyntiew ïa ka phutbol ha baroh ki liang hapoh ka jylla. Ka BFC kan sa ïarap ïa ka jylla “ban pynïasnohlang ïa ka Meghalaya lem bad kiwei” ha ka liang jong ka coaching, u la bynrap.
U Director jong ka Bengaluru – u Darren Caldeira u pyntip ba kane ka jingïatehlok hapdeng ka Rangdajied bad ka Bengaluru ka long na bynta lai snem, hynrei ka khmihlynti ba kan ïaid kham slem. “Ka Rangdajied ka don ïa kajuh ka thong bad ka jingangnud kum ba Ngi don bad Ngin pynthikna ba kan long ka jingïatreilang kaba seisoh bha,” u la ong.
“Ka jingïatehlok ka jong Ngi bad ka Rangdajied United FC kan ïaid ryngkat ha ka ban ïarap ïa Ngi ban pynïar ïa ka prokram wad sap (talent pool) bad ban shem ïa ki khynnah samla kiba kynsai ha Meghalaya.” la bynrap biang u Darren Caldiera.
Khyndiat haba phai sha ka Bengaluru FC, kaba la shem ha u snem 2013, ka la ïoh ban rah katto katne ki khusnam ha ki samoi lehkai ba ladep, bad kine ki khusnam ki kynthup ïa ka namlahduh ha ka I-League, ISL, Durand Cup, Federation Cup bad ka Super Cup, kata tang ha ka por kaba lyngkot eh naduh ba la shem ïa ka.
Lah ban kdew ba lyngba kane ka jingïatehlok, ka long ka kabu ksiar ïa ki khynnah ïalehkai jong ka Rangdajied United FC ba kin nang lah ban kham pyntbit shuh ïalade ban poi sha ki kyrdan ba kham shalor, ym tang kata hynrei ka long ka kabu ïa ki ban poi sha ki kyrdan ïalehkai jong ka ri.
Nalor kane, baroh ar klob kin ïatreilang ban wanrah ïa ki prokram ban pynleit jingmut ha ka ban kyntiew ïa ki coach. Kane kan long ka jingmyntoi ïa ki coach ka Rangdajied United FC lyngba kine ki prokram kiba yn sa pynlong da ki nongkitkam kiba la shemphang jong ka Bengaluru FC, da kaba pynthikna ba ki don ïa ki tiar kiba biang ban pynroi ïa ki samla kiba don sap da kaba pyndonkam ïa ki buit jong kane ka juk stad ba mynta.
