Nongpoh, Nailur 23: Ka sorkar Meghalaya lyngba ka tnad Commerce and Industries mynta ka sngi kala pynkup burom ïa 24 ngut ki samla, ki longkmie bad longkpa kiba la pyndep ïaka prokram ai jinghikai ba ar taiew lynter halor ka rukom shna tiar daka kti da kaba pyndonkam da ki siej kaba la tip kum ka ‘Executive Course On Bamboo Handicrafts & Utility Products Making’ hapoh ka skhim ‘Raising And Accelerating MSME Performance (RAMP)’ ba la pynlong da ka Tnad Commerce & Industrial jong ka sorkar Meghalaya ha ka jingïatreilang bad ka North East Cane and Bamboo Development Council.
Ïa kane ka prokram ai jinghikai ba 2 taiew lynter la pynlong ha NECBDC, Byrnihat, Assam kaba la sdang naduh ka 9 tarik Nailur bad pynkut noh mynta ka sngi ka 23 Nailur ryngkat ka jingpynkup burom ïaki hadien ba kila pyndep ïa katei ka prokram ai jinghikai ban shna ïaki tiar bapher bapher kum ki Pela, ki kriah bad kiwei kiwei da kaba pyndonkam da ki siej.
Ha kane ka sngi ka jingpynkut la wan ruh ban sakhi lang da u Bah MC Omi Ningshen IRS Managing Director ka NECBDC haka jingdon ryngkat lang u Bah H Decruse General manger ka DCIC Ri-Bhoi, Pulak Mandal Asst. Manager ka NECBDC lem bad kiwei kiwei ki ophisar sorkar naka tnad Commerce and Industries.
Naka liang ki nongkren ha katei ka sngi kila ai ka jingkhublei ïa baroh kitei kiba la pyndep ïaka prokram ai jinghikai bad kyrmen skhem ba katei ka prokram kan long ka jingkyrkhu bad ka jingmyntoi ïaki ba kin ioh ban pyndonkam ïaka sap shna kti ka jong ki da kaba pyndonkam da ki siej lyngba katei ka jinghikai bad kin lah pat ban pyntreikam ïaka sap jong ki sha ki jaka ba ki leit phai, bad khamtam ba kin lah ban sengkam sengjam kum ka lad kamai ba kin ieng hala ki jong ki kjat.
