Nongpoh, Nailur 27: Ki nongïalam ka National Peoples’ Youth Front (NPYF) Umroi Block, mynta ka sngi ki la pynkup burom ïa ki khynnah ïalehkai ka Mynken Christian Higher Secondary School lem bad ïa 3 ngut kiwei pat kiba la wanrah nam bad burom ïaka thaiñ Umroi, ka district bad ka jylla hi baroh kawei kiba dei na Umroi Constituency.
Ha katei ka jingpynkup burom ïa kitei ki rangïalehkai jong ka Mynken Christian HSS bad ki riew khmat bala wanrah nam bad burom ïaka dong Umroi, u Bah Damanbait Lamare, MLA ka Umroi, u la long kum u Kongsan bad ban sam khusnam sha baroh ki rangïalehkai ka Mynken Christian HSS lem bad ïa lai ngut ki briew, kiba kynthup ïa u Babu Everlasting Pyngrope, Principal ka Mynken Christian HSS, uba la ioh ïa ka National Teachers Award 2024, ka Kong Mihsngewbha Rymbai, kaba la khur ïa ka takma rnong ha ka 45th World Arm Wrestling Championship bad ha ka 26th World Para Arm Wrestling Championship lem bad ia ka Kong Brotibon Mukhim, kaba la ioh ïa ka khusnam kum ka Best Asha Award ha ka National Level.
Ïa katei ka prokram pynkup burom la pynlong ha ophis ka NPP kaba don ha Dwarksuid, haka jingdonlang ki nongkitkam bad nongïalam jong ka NPP Umroi Block bad kiwei kiwei ki riew rangbah.
Haba kren ha katei ka sngi naka liang u Bah Damanbait Lamare kum u MLA u la ai ka jingïaroh sha baroh kitei kiba la ioh pdiang ïaka jingpynkup burom namar ka jinglah jong ki ban wanrah nam ka long ka jingsarong ym tang ïaka thaiñ Umroi hynrei ïaka district bad ka jylla baroh kawei.
U la kyntu ruh ïakitei ki rangïalehkai ba kin dang minot bad kilan bha ïalade bad kumjuh ruh kito kiba la ai ka jingshakri paidbah lyngba ka kam kaba ki trei la ha kano kano ka bynta ba kin dang bteng ban lehbha shuh shuh, naka bynta ka bha ka miat haka imlang ka sahlang baroh kawei.
