Nongstoiñ, Risaw, 29: Ka New Nongstoiñ Sport Social & Cultural Club, ha ka sngi saitjaiñ ka la pynlong ïa ka jingïalang pynkup burom ïa ki samla pule ka shnong New Nongstoiñ kiba la pas ïa ki examin ha ki kyrdan bapher bapher.
Ïa ka jingïalang la pynlong ha Market Complex New Nongstoiñ, ha kaba u bah D. Marbaniang u ba la wan mihkhmat ha ka jaka jong u MLA ka Nongstoiñ kum u kongsan ha ryngkat ka jingïadonlang ki nongkitkam ka Youth Congress, u Sordar ka shnong New Nongstoiñ, ki samla pule ki kmie kpa bad kiwei kiwei.
Ki la don haduh 15 ki samla pule kiba pas ïa ka examin SSLC bad HSSLC, 5 ngut kiba la pyndep ïa ka Graduation bad Post Graduate bad kawei kaba la ïoh ïa ka kyrdan PHD kiba la ïoh pdiang ïa ki khusnam na ka Sport Club.
U kongsan haba ai jingkren ha katei ka jingïalang, u la ïa khublei ïa ki khun samla pule ka shnong New Nongstoiñ kiba la ïohi pdiang ïa ki khusnam na ka jingtrei shitom bad minot ka jong ki ha ki jingpule. U la kyntu ruh ba kin nang ïai trei shitom shuh shuh ban poi sha ki kyrdan ba kham sha jrong.
Shuh shuh u la pynkynmaw ruh ïa ka jingïaid lynti ka jong u ha ki jingpule bad hapdeng kiba bun ki jingeh, u la ïaid bad pyndep ïa ki jingpule ki jong u tad haduh ba un da ïohlad syndon ban hikai ha ki skul bad ruh ban seng ïa bun phew tylli ki skul ha ka thaiñ Nongstoiñ, ban plie lad ïa ki khynnah kiba wan na ki long ïing ba duk ba kyrduh.
