Pynkup burom ka KSU Mawlangwir Unit ïa ki samla kiba leh bha ha ki eksam bad ïa ki nonghikai ba la shongthait

Mawkyrwat, ‘Naiwieng 28: Ka Khasi Students’ Union (KSU) jong ka Mawlangwir Unit ha ka 26 tarik ‘Naiwieng, 2022 ka la ïoh ban pynkup burom ïa ki 37 ngut ki samla pule kiba la leh bha ha ki eksam bapher bapher, ïa ki 3 ngut ki Nonghikai ba la shongthait na ka kam hikai skul bad ruh ïa ki nongmuna sha ki 5 tylli ki skul hapoh ka shnong Mawlangwir bad Mawranglang bad kane ka jingpynkup burom ka long kum ka jingpyrto sngew burom ïa ka jingshakri jong kine ki skul ban ai jingnang jingstad ïa ki khynnah, ki samla jong ka dong ka thaiñ baroh kawei.
Haba ai jingkren ha kane ha kane ka sngi, u James H. Mawphniang, Assistant General Secretary KSU Central Body kum u kongsan, u la ai khublei kyrpang ïa ka KSU Mawlangwir Unit kaba la pynlong ïa kane ka jingpynkupburom na ka bynta ki samla kiba la wan shakhmat ha ki jingpule jong ki ha ki eksam bapher bapher. Ula pynkynmaw ruh ba naduh u snem 1994 ka seng ka la shim ïa kane ka sienjam ban pynkupburom ïa ki samla pule jong ka Ri Khasi baroh kawei, bad dei tad haba ka seng ka la shim ïa kane ka sienjam, kham hadien ka sorkar ruh ka la shim lang ïa kum kine ki jingpynkupburom ïa ki samla kiba pass bha.
Kumta, u la ai khublei bad kitbok kitrwiang ïa ki samla ba la shah pynkupburom bad ïa ki Nonghikai ba la shongthait na ka kam hikai skul. “Ban tei ïa ka jaidbynriew kam dei ka kamram tang jong ka KSU ne kiwei ki Sengbhalang”, ong u James H. Mawphniang bad kumba kiba bun ki pyrkhat ba dei tang ki nongïalam bad ki dkhot sengbhalang kiba dei ki nongtei ïa ka jaidbynriew, hynrei u ong ïa ki em, kata ka jingpyrkhat kaba bakla, ka jaidbynriew ka donkam ïa baroh ki samla, ki rangbah, ki longkmie ban tei ïa ka jaidbynriew, bad ka jingnang jingstad ka long kaba donkam bha, ba kum ki Samla kiba la nang la stad kin long ma ki ki nonglam lynti ïa kiwei pat.
U la ong ruh ba lada ki phai sha ka jylla la jong, ngi sngew ban ong, ba ngi sngewkmen ha kawei ka liang haba ki peit ïa ka literacy rate naduh klas – I haduh klas- X namar la jan man ki shnong ki la jan kot shispah na ka shispah, hynrei klas – X shaneng pat bun kiba pep skul shiteng por. “Ka por ka dawa ïa phi ki samla kiba shah pynkupburom mynta ban ïalam lynti ïa kiwei pat ki samla, namar kiba bun ynda la pass klas – X kim nang shuh ban jied ïa ki subjek ba kin leit pule”, ong u James H. Mawphniang haba kren ai mynsiem ïa ki khynnah kiba la shah pynkup burom.
Shuh shuh haba phai sha ki ophis sorkar, u la ong ba kiba bun ki nongtrei ki dei kiba nabar ka jylla, kumta ka jingduna ki ophisar khasi ka pynlong ba ngin shah ñion ha baroh ki liang. Ka Seng namarkata, ha i bor barit ha u snem 2012 ka la phah pule ïa ki samla ha ki laiñ bapher bapher kum ki Engineering, ki B. Pharm bad kiwei kiwei ïa ki samla khasi bad sngewkmen ba mynta ki la shong ha ki ophis sorkar bapher bapher.
Kumjuh ruh ruh ha u snem 2021, na ka liang ka seng na ka daw ba ka jingduna ki ophisar khasi ka la shim ïa ka sienjam ban kyrshan ïa ki samla kiba tbit ba kin leit ha ki jaka shah hi kai ne coaching ïa ki exam Civil Service Examination (CSE) khnang ba ki samla kin ïoh ban ïakhun ïa ki eksam bapher bapher ba kin ïoh ban rung ruh ha ka bynta ba ki ki thmu.
U James H. Mawphniang u la ong ba ngi im ha kine ki sngi kiba ka por ka dawa ïa ka jingïakhun ym da ka wait ka stieh hynrei da ka jabieng bad u khulom, kumta kiba bun ki samla jong ngi ynda ki la pyndep ïa ki jingpule ki kut tang haba wad ki kam sorkar jylla. “Ha ka jylla jong ngi ki don ki ophis jong ka sorkar India, kum ki Bank, ka NEHU, NEEPCO, NEPA bad ha kine, kiba bun ki nongtrei ki dei nabar ka jylla, namarkata, kum ki samla kin pyrshang noh ban thaw ki lad ki lynti ban poi sha khmat khnang ba nangne shakhmat haba thoh ïa ki exam bad ban ïoh ban trei noh da lade ha kine ki ophis”, ai mynsiem shuh shuh u James H. Mawphniang.
U la ai mynsiem ruh ba kum ki samla kiba la nang la stad kynmaw ka jaidbynriew ka donkam ïa ki, to kin buh ïa ka jaidbynriew ha khmat bad ïa kin ïa tei lang ban pynskhem ïa ki kynroh jong ka jaidbynriew baroh kawei.
Kiwei pat kiba ïadonlang ha kane ka sngi ki long naduh u bah Sounder Strong Cajee, Nongïalam barim ka KSU kum u symbud kongsan, ryngkat ruh u Pulljohn Wanniang, Organising Secretary KSU SWKHD), u Plosbor Kharjahrin, Environment & Cultural Secretary KSU SWKHD), u Poldip Tongwah, President KSU Mawkyrwat Circle, u Melvernstone Marngar, Asst. Education KSU Mawkyrwat Circle, lem bad ki Nongïalam jong ka shnong Mawlangwir bad Mawranglang, ki Nonghikai skul bad ki kmie ki kpa jong ki samla pule.