Tyrsad, ‘Naiwieng 28: Ka Sarajanai Village Organization (SVO), Tyrsad Umkseh, Pamsanngut Sirdarship ha ka jingïatreilang bad ka Nehru Yuva Kendra Sangathan (NYKS), Shillong ka la pynlong ïa ka Sngi ka Riti Treikam ka Ri ne ka Constitution Day jong ka Ri, ban kynmaw ïa ka jingpdiang ïa ka Riti Treikam ka Ri ha u snem 1949 da ki nongïalam ka Ri.
La pynlong ïa kane ka jingrakhe ha ka 26 tarik u ‘Naiwieng, 2022 ha ïing dorbar jong ka shnong Tyrsad Umkseh, East Khasi Hills District hapoh ka jingpynïaid ka samla Ibakordor Rynjah kaba long ka National Youth Volunteer ka NYKS, jong ka Mawphlang Block.
U Bah Staising Kharbteng Sub-Inspector of Schools, Mawkyrwat kum uwei na ki ‘riew shemphang ne Resource Person u la pynpaw ba kumno la thaw ïa ka Riti Treikam ka Ri lyngba ka Constituent Assembly bad ïa ki hok jong ngi kum ki nongshong shnong ba la pynkupbor da ka Riti Treikam ka Ri. U la pynkynmaw ruh ïa ka kamram ba ki don ban noh synñiang ïa ka bha ka miat ka Ri.
Ka kong Mary Rani kaba long ka nongsaid-aiñ ka la batai bniah halor ki khyrnit kiba pher bapher kiba don ha ka Riti Treikam ka Ri ba kumno ki paidbah kin sngewthuh ïa ki kyndon ba la pruid dak da ki nongïalam ka Ri kiba ai ïa ki hok laitluid ki nongshong shnong.
U bah J. Nonglang Officer In-charge jong ka Mawngap Police Station u la ong ba ki nongshong shnong ki dei ban mih shakhmat ban ïatreilang khamtam bad ka tnat kam pohïing khnang ba kan don ka jingïadei kaba jan hapdeng ki paidbah bad ki tnat sorkar.
U bah Ridley Rangslang u la batai ïa ka dor jong ka Riti Treikam ka Ri kaba heh bad ïar napdeng ki Riti Treikam ki Ri ka pyrthei kaba ai ha ngi ïa ka hok ha ka Ri Synshar paidbah.
La ïoh ruh ïa ka jingkren na u bah David Khasain, Rangbah Shnong, ka kong Sunalin Rynjah, President ka V.O kaba kren pdiang sngewbha bad ka kong Ritngen Umdor kaba ai khublei.
Ha kane ka sngi jong ka jingrakhe la ïoh ruh ïa ka jingpule ïa ka ‘Preamble’ ka Riti Treikam ka Ri.
