Shillong, Rymphang, 03: Ka Bharatiya Janata Party (BJP) Meghalaya Pradesh ha ka sngi Saitjaiñ ka la pynkup burom ïa i Kong Silbi Passah iba la shah jied ban ïoh pdiang ïa ka khusnam Padmashree na ka President ka ri India ka Droupadi Murmu bad ïa u Bah Alexander Laloo Hek uba la ïoh pdiang dang shen ïa ka khusnam Dadasaheb Phalke ha New Delhi.
I Kong Silbi Passah i la shah shah jied ban ïoh pdiang ïa ka Khusnam Padmashree halor ka jinglah jong i ban kyntiew ïa ka put ka tem bad ka rwai ka siaw sur tynrai, katba u Bah AL Hek u la shah pynkup burom da kane ka khusnam kum u Myntri Sorkar ba tbit bad kum u nongshakri paidbah ba khlem shongthait ha ki 25 tylli ki snem kiba u la long u nongmihkhmat jong ka Pynthorumkhrah Constituency bad nalor u synniang u bynhei ba u la noh sha ka jylla bad ka ri baroh kawei.
Ha ka jingpynkup burom ïa kine ki arngut, la sakhi lang da u President ka BJP Meghalaya Pradesh u Rikman G. Momin bad kiwei kiwei de ki nongïalam bahakhmat jong ka party.
I Kong Silbi haba kren ha kane ka jingïalang i la pynpaw ïa ka jingkmen ba ka Sorkar Pdeng ka la ai ka jingithuh ïa ki kam ba i la trei da ka khusnam Padmashree 2024.
“Nga ladei ban ïaid lynti da ki bun bun snem kum ka nonghikai ïa ka Subject Hindi ha ki skul bad ban kyntiew ïa ki jingrwai bad ki poitri tynrai. Kum ka nongshong shnong jong ka jylla Meghalaya nga la ïoh shibun ki lad ban pynsaphriang ïa ki jingrwai bad ki poitri tynrai ym tang hapoh ka ri India hynrei sha kiwei pat ki ri,” la ong i Kong Silbi.
Haba ai ka jingïaroh ïa ka BJP Meghalaya kaba la ai ka jingithuh, i la ong “burom ïa ka riti dustur bad ïa ka ktien tynrai bad ka pyrthei kan burom ïa phi.”
U Bah Hek haba ai jingkren u la ong ba ka khusnam kaba u la ïoh kam shongdor bad ka khusnam ba la ïoh da i Kong Silbi kata ka Padma Shri Award 2024.
U la ong ba ka jingïoh khusnam kam dei ka sngi bakut ban trei ïa ki kam hynrei ka dei ka jingsdang ban trei ïa ki kam ban nang kyntiew ïa ka jaidbynriew bad ïa ka jylla hi baroh kawei.
Da kaba pynpaw ïa ka jingkmen halor kane ka jingshahpynkup burom, u Bah Hek ula ong ba ïa ka Dadasaheb Phalke Award la ai ïa u kum u Myntri ba kynsai tam hapoh Meghalaya.
