Pynkhuid ki Society ïa ka wah Nonbah ha lyngkhuh snem ba 53 snem ka Meghalaya

Nongstoiñ, K’lyngkot 21: Kum ka jingrakhe ïa ka lyngkhuh snem, ki ar tylli ki Society kiba trei kam ha ka thaiñ Nongstoiñ ka Halatynrai Eco Tourism Multipurpose Cooperative Society bad ka Eco Regreen Multipurpose Cooperative Society, ha ryngkat ka jingïatreilang bad ki bor pynïaid District ka West Khasi Hills, ki la pynlong da ka prokram ba kyrpang ha kaba ki la pynkhuid ïa ki jaboh jabaiñ ha ki ar tylli ki wah kiba tuid napdeng jong ka sor Nongstoiñ.
Ha kane ka sngi ki dkhot jong kitei ki ar tylli ki Society ki la trei shitom naduh dang step ban tam ïa ki jaboh jabaiñ kum ki bilor, ki plastic bad bun bah ki jaboh kiba la sah kut ha ki jar ba ki la pynap khnang ha ki jaka ba biang.
Nalor kata hadien ba ki la tam ki la pynlang ha ki jaka ba la pynbeit bad ki la pynïakhlad ha la ki jong ki jong ki jait jaboh, khnang ban pynkit ïa kiba dei ban leit bret ha ki jaka theh ñiut ba la pynkhreh khnang.
Ki bor synshar district ki la pynkhreh lypa ïa ki kali pynlip ding ba kin pynbiang ïa ka um bad ba kin kynshait ïa ki nala kiba la dap da ki jaboh jabaiñ kiba la pyntuid na ki dukan sha bad ki ïong ki sem, ki Restaurant kiba don ha baroh ar liang kitei ki wah.
Ban pynkhuid ïa kitei ki ar tylli ki wah ha ka por tlang, tang ha ka shi sngi ka long kaba eh than ban pyndep namar katba ki dkhot jong kitei ki Society ki nang pynkhuid, ki nongshong dukan bad ki ba shong ha ki ïing ki sem kiba don harud kitei ki wah, ki nang pynjaboh bad wat ki nongleit nong wan ruh katba ki nongpynkhuid ki dang trei ma ki pat ki nang bret ïa ki jaboh ha pyrshah jong ki.
Haba phai ha ka jinglong jong ki paitbah nongleit nongwan na kawei ka jaka sha kawei pat, khamtam eh ha shilynter ka surok National Highway 44(E) Shillong Tura ha baroh shilynter surok ha ki bynta kiba hap ha West Khasi Hills ki dap tang da ki jaboh jabaiñ kum ki bilor um, ki bilor kyiad, ki plastic haduh ba la ijli ban peit. Ka jingbun palat ki jaboh jabaiñ ka dei namar wat ki trai shnong kim pat sngewthuh ïa ka jinglehkhuid.
U Secretary ka Eco Regreen Multipurpose Copoeprative Society haba ïakren bad u nongthoh khubor, u la ong ba ka jing jur jong ki jaboh jabaiñ ha katei ki wah ka dei ka jingbym ñiewkor jong ki paitbah nongshong shnong ïa ka jingkhuid jong kitei ki wah.
U la ong ruh ba ki nongïalam jong kitei ki ar tylli ki Society ki la pynsngewthuh ïa ki paitbah nongshong shnong na ka por sha ka por, ba kin ïatreilang bad ki ban wanrah ïa ka jingkhuid jingsuba ha kitei ki wah bad ha baroh ki sawdong saw kun jong ka sor Nongstoiñ. Hynrei haduh mynta ki dang don shibun bah ki bym kwah ban ïatrei lang.
U la kyntu ïa ki paitbah nongshong shnong jong ka New Nongstoiñ, Uppewr New Nongstoiñ bad ki paitbah jong ki shnong ba marjan, ba nangne shakhmat kin pyrshang ban kiar na kaba bret pathar ïa ki jaboh jabaiñ ha kitei ki wah bad harud ki surok ne lynti ïaid kjat.
Ki nongshong dukan bad kiba shong ïing harud kitei ki wah ki dei ban pyrshang ban kiar na kaba bret ïa ki jaboh jabaiñ, ki dei ban pynkhreh da ki jaka pynlang kiba biang namar ki kali kit ñiut kiba ka sorkar ka la pynïoh ki la dep don bad ki ju wan ban lum ïa ki man ka por.