Pynkhreh shait shait u bah Fernandes Dkhar na ka TMC

Nongstoiñ, K’lyngkot 9: U samla rangbah bah Fernandes Savio Dkhar u ba long ruh u State Youth President jong ka Trinamool Congress Youth Wing, u la pynkhreh shait shait ban ïa aireng na ka Rambrai Jyrngam constituency ha ka election MLA ka ban sa long ha u bnai ban wan.
U bah Dkhar haba ïakren bad u nongthoh khubor, u la ong ba ka jingpynkhreh jong u ban ïakhun ïa ka election ka dei ka sien ba nyngkong. Hynrei um da sngew phylla shuh, namar u la don ryngkat bad u Dr.Mukul Sangma naduh ba u dang sdang samla ha ka party Congress bad u la tip bha ruh kumno ban pynkhreh ban ïakhun ïa ka election.
U la ong ba kumba ka long mynta, ki paitbah jong kiba bun ki constituency ki la sdang ban phaikhmat sha ka TMC. Kane ka la jia long kumjuh ruh ha Rambrai Jyrngam constituency, namar la sakhi ha kine ki sngi ba ki paitbah ki la phai khmat bha sha ka TMC. Dei halor katei ka nongrim ba u don ka jingsngew skhem hapoh ka mynsiem ba un ïaleh beit ïa ka election wat lada kan long kumno kumno ruh.
U bah Dkhar u la ong ruh ba ka jingïaleh jong u ïa ka election na Rambrai Jyrngam, kan long kaba jwat haduh katta katta, namar u hap ban ïakhun pyrshah ïa u MLA ba mynta u bah Kimfa Sidney Marbaniang u ban sa ïaleh na ka NPP, ki ar ngut ki MLA barim kata u bah K.P.Pangniang na ka HSPDP, u bah Francis Pondit Sangma na ka BJP, u ba dei ruh u MLA barim ka Mawshynrut Constituency, nangta u bah Goldenstar Nonglong u ba dei u Saïantis u ban ïakhun na ka Congress bad kumjuh ruh u bah Remington G.Momin u ophisar sorkar u ba la shongthait u ban ïakhun kum u kyrtong shimet.
Lah ban ong ba ka election ha Rambrai Jyrngam kan long kaba itynnad bha, namar u MLA ba mynta u dei u ba shu mih jyndat na ka Congress ka party kaba u la jop don burom kum u nongmihkhmat. Hynrei namar ba u la shah suspend noh um banse ban leit snoh ha ka NPP namar ka dei ka party kaba ïalam ïa ka sorkar jylla.
Nangta u bah Francis Pondit Sangma ruh ha kaba sdang u la pyrshang ban pan tiket na ka Congress, namar ha ka por ba u jop kum u MLA u la jop kum u kyrtong shimet. Haba u la leit pynïasoh pat sha ka Congress, hynrei ka Congress kam shym la ai tiket satia, namar ki la dep ïasngewthuh jingmut lypa bad u Saïantis na Nongstoiñ. Kumta um banse ban pan tiket noh na ka BJP bad mynta wat la ka BJP kam pat pynbna tiket ruh, u bah Pondit u la nang trei shait shait ïa la ka kam kaba u dei ban trei.
Nalorkata, u bah K.P.Pangniang ruh kum u MLA barim jong ka Constituency bad u president rangbah ka ka HSPDP, um shym la shongthait shuh hynrei u la trei shitom katba kot la ka bor ban leit sha ki paitbah ban pan biang ïa ka jingkyrshan ha ka election ban wan.
Nangta u bah Remington G.Momin u Pastor ka Balang Baptist bad u ba dei ruh u Ophisar sorkar, u ba bat kum u Additional Sub Divisional of School Education Officer jong ka West Khasi Hills, u la trei shitom haduh katta katta ban poi sha ka thong.
Ka long ruh kaba phylla ba u bah Momin bad kumjuh ruh u bah Pondit, kim nang bha ban kren ïa ka ktien Khasi bad wat la ki trei shitom katno katno ruh ki shem jingeh bha ban pynshai paitbah ha kaba ïadei bad ka election.
Nangta u bah Goldenstar Nonglong u Saïantis u ban ïaleh na ka Congress, ha ka jingshisha u dei u nongkyrshan ba radbah jong ka HSPDP ha Nongstoiñ constituency ha ki snem ba la dep. Hynrei, mynta pat u la pyrshang katba kot la ka bor ban leit sha ki shnong ki thaw ka thaiñ Rambrai, ban pan ïa ka jingkyrshan na ki paitbah ban pynjop don burom biang ïa ka Congress na kane ka Constituency.