Shillong, Risaw 20: U Chief Secretary ka jylla, Bah DP Wahlang ha ka sngi Palei u la wan ban pyllait paidbah ïa ki thup buh jingkynmaw kiba la shna kyrpang na ka bynta ka jingrakhe dap 100 snem jong ka Dr. H Gordon Robert Hospital, Jaïaw ha ka jingïalang kaba long ha Margaret E Buckley Memorial Hall.
Katei ka jaka ai jingsumar kan plie pyrda ïa ka jingrakhe dap 100 snem ha ka 04tarik u Naiwieng mynta u snem bad kan pynhap pyrda pat ha ka 03tarik u Naiwieng jong u snem ban wan.
Haba kren hadien ka jingpyllait paidbah ïa kitei ki tiar u Chief Secretary u la ong ba man ka por ba u poi ha katei ka hospital ka pynkynmaw ïa ki por ba la leit namar ka kmie jong u ka la trei hangtei haduh kumba 36 snem kum ka nos. Shuh shuh u la ong ruh ba dang shen u la kynduh ïa u Additional Chief Secretary ka Manipur uba la ïathuh ba ka kmie jong u ruh kadei kaba la trei teng ha Robert Hospital kum ka nos.
Da kaba pynpaw ïa ka jingkyrmen ba utei u Addl CS shen un sa shimti noh ïa ka kam Chief Secretary ha katei ka jylla, u Bah DP Wahlang u la ong, “Ka la ong ka jingsngewsarong ba ki khun jong ki arngut ki nos kiba trei ha kane ka hospital ki bat ïa ka shuki Chief Secretary ha ki ar tylli ki jylla.”
Shuh shuh da kaba ïaroh ïa ka jingïaid lynti jong katei ka hospital naduh ki snem 1922, u Bah DP Wahlang u la ong ruh ba katei ka jaka sumar ka la kiew stet ha baroh ki liang wat hapdeng bun ki jingeh ba ki mad ha ki khyndiat snem ba la dep.
Ha kajuh ka por u la ïaroh ruh ïa kitei ki thup sah jingkynmaw kiba ka hospital ka la pynkhreh na ka bynta ban pynïaid iew kum shi bynta ban pynphuh shuh shuh ïa katei ka jingrakhe dap 100 snem jong katei ka jaka ai jingsumar.
La ïoh ruh ïa ka kaiphod lyngkot ba la ai da u Administrative Officer, Bah KW Marbaniang halor ka hospital. La donlang ha kane ka sngi naduh u Rev. SS Majaw, Chairman ka Hospital Governing Body, nangta u Tbn FJ Mairom ba dei ruh u Organising Secretary Centenary Celebration, Rev Dr. BL Nongbri Member Souvenir Sub Committee, Rev. HE Marbaniang, Member Governing Body, Dr. R Nongrum nalor kiwei kiwei ki doktor bad ki nos . La ïoh ruh ïa ka jingrwai kyrpang ba la ai da u Dr. Mark T kharsyntiew, Incharge RHC bad ka jingduwai na i Sr. Maldaris Shangliar, Assistant Nursing Superintendent, Incharge Laitmawsiang RHC bad kiwei kiwei.
