Pynkhreh lypa ka jylla ban ïada lada wan u jumai bah pynlong ai jinghikai ha baroh ki District
![](https://mawphor.com/wp-content/uploads/2023/10/1C5A1785a.jpg)
Shillong, Risaw 12 : Ka jylla Meghalaya kaba hap ha ka Seismic Zone – V ne ka jaka kaba ju khie jur bha u Jumai, ka la pynkhreh bha ïalade lada wan u lynshop biang u jumai uba jur kumba jia ha u snem 1897, da kaba pynlong ia ki mock drill ha baroh ki 12 tylli ki District ka Jylla kaba long kum ka jingpyni nuksa bad jinghikai kumno ban ïada lada jia kata ka jingkhynniuh jumai.
Man ki District jong ka Jylla ki la ithuh haduh 5 tylli ki jaka ban pynlong ïa kane ka mock drill, kaba long ruh kum ka jingai jinghikai ïa ki kynhun ai jingïarap ba kumno kin leh bad kiei ki kam ba ki dei ban leh lada jia ba wan lynshop u jumai uba jur.
Hangne ha East Khasi Hills la pynlong ïa ka mock drill ha Shillong, kane ka mock drill ka la sdang da ka jingpynriew siren kaba long kum ka jingmaham ïa ki nongshong shnong ba kin long lypa kiba la pynkhreh ïalade ïa ki jingma kiba ap ban wan lada khynñiuh u jumai uba jur.
ïa kane ka mock drill la pynlong ha ka surok ha Polo bad ki surok na Polo sha Wahingdoh, Polo Super Market, ki dukan kiba don ha ka thaiñ Polo, Hotel Polo Towers, SBI building, Polo bad MeCEL, Lumjingshai, Samkhamti Petrol Pump, Urkaliar, Female Health Worker, School of Nursing and School of Nursing, TTC, Ganesh Das Government Hospital, Lawmali, St. Xavier’s School, Polo, Pynthorumkhrah Golflinks Higher Secondary School bad Shillong Secondary School, Forest Colony.
ïa ka Incident Command Post, Medical Camp, Staging area, Relief Camp, Base Camp la buh ha SRGT Parking lot Polo bad ha madan 3rd Ground Polo.
ïa kane ka Mock Exercise la pynlong ka ban ïasyriem kum jingkynñiuh u jumai kaba la jia ha u snem 1897 bad ka jingkhie une u jumai ka la sdang na Shillong bad udei u jumai uba khlaiñ tam ha ka histori.
Ha kane ka sngi la wan ban ïashim bynta da ki bor pyniaid District, ki shipai, ki pulit, NDRF, SDRF, Fire and Emergency Services, Hospitals, Skul, College, ki kynhun sengbhalang, nongshong shnong, ki dkhot ka Bharat Scouts and Guides, Indian Red Cross Society, NSS, Aapda Mitra bad kiwei kiwei.
Ka jingpynlong ïa kane ka Mock Drill ka la pynmih pat ïa ka jingdheng kali ha kylleng ka nongbah Shillong ha kaba bun ki briew kim shym la tip ba kan don ka Mock Drill.
Kane kajuh ka exrcise kala long ruh ha Jowai, West Jaintia Hills, west Khasi Hills, Ri-Bhoi bad South West Khasi Hills nalor ka Ri-lum Garo.