Shillong, Risaw, 12 : Ki kynhun niam bapher bapher ha ka sngi Palei ki la shim ïa ka rai ba kin sdang noh naduh ki jaka Mane Blei ban pynshai sha ki paid riewngeit jong ki halor ki jingma kiba ap na ka jingjyllei palat u drok.
Ïa kane ka rai ki nongïalam Niam ba don ha ka shatri jong ka Shillong All Faith Forum ki la shim ha ka jingkynduhlang ba la khot da u Myntri ka tnad Social Welfare ka sorkar jylla, Bah Paul Lyngdoh.
“Ngi la ïakren ruh halor ka jingdonkam ban don ka jingpynshai bad jingpynsngewthuh ïa ki jingma jong u drok wat na ki jaka Mane Blei ruh,” ong u Myntri.
U Bah Paul u la ïathuh ruh ba u sngewkmen haduh katta katta ba ki nongïalam Niam ki la mih shakhmat ban tynrong lang ïa kane ka thma pyrshah ïa u drok ha ka jylla.
U la ïathuh ruh ba ka jingïalang ka la shim ïa ka rai ba ha ka 05tarik Nohprah mynta u snem kin sa pynlong ïa ka prokram ai jinghikai ka bynta ki 500 ngut ki samla pule kiba don ha ka klas 10 haduh klas 12 ha kaba yn don ruh ki riew shemphang ki ban ai jingbatai, ïa kiba yn kynthup na ka Social Welfare, ka tnat Pulit bad na ki nongïalam Niam.
U Myntri u la ong ruh ba ki nongïalam Niam ki don ka bynta ba kham khraw ban ïakhun pyrshah ïa u drok bad na ka liang ki nongïalam ka SAFF ki la kular ban kren ïa kane ka mat ha ki Ïingmane, ki Mandir, Masjid ter ter, wat ban ïasyllok bad kito kiba la jngai na la ki ïing ki sem namar jong u drok.
Ha kawei ka liang u Bah Paul u la ïathuh ba ki don ki kynhun niam kiba pynïaid ïa ki rehabilitation center, bad ka Sorkar ka buh thong ban buh sa 10 tylli kum kine ki center ban pynïaid da ka Sorkar hapoh u Lber jong u snem 2024, bad na ka bynta kane ka jingpynlut kan long 90 percent na ka Sorkar Pdeng bad 10 percent na ka Sorkar Jylla.
