Pynkhreh leit ïakhun ka samla Aishwariya sha ka Miss Teen Diva, pan jingkyrshan na ki paidbah

By Mawphor Editor On Jul 8, 2026

Shillong, Naitung 07: Ka Samla Aishwariya Malang kaba na ka shnong Khliehiongriang West Jaiñtia Hills District kaba la shah jied kum ka Miss Teen Diva ha ka national level ban mihkhmat ïa ka Meghalaya, naduh ka 11 tarik une u bnai Naitung haduh ka 19 tarik une u bnai Naitung, 2026.
Kum ka samla kaba dang 18 snem ka rta ka samla Aishwariya ka la pan ka jingkyrshan na ki para samla ka jylla kumjuh ruh na ki paidbah ha kane ka jingïakob ka ban long ha Jaipur.
Kum ka samla kaba la jop teng ïa ka Miss teen Jowai, Teenager Pageant ka samla ka la ai mynsiem ïa ki para samla ba kin iaineh skhem ha ki jingthmu khnang ba kin poi sha ka thong bad ha kajuh ka por ban ym klet pat ïa ka kam.
Ka Samla Aishwariya kaba la shah jied ban leit sha ka kyrdan kaba khatduh sha katei ka jingïakob thei bhabriew bad ka ban mihkhmat na jylla Meghalaya, ka la ong ba ka la sdang ban sngewtynnad ïa kane ka kam naduh ba ka dang don ha ka rta kaba 14 snem ha kaba ka la ïakhun ïa ka jingïakob ïa ka Miss Jaiñtia Queen ha u snem 2024 bad hadien kane ka la mad ki jingeh bad ka hap ban sangeh shwa kine ki jingïakob na ka daw ba ka hap ban ïaid shakhmat shwa ha ki jingpule kum ka jingleit pule ha ka klas kaba 11 bad kaba 12 bad ban pynkhreh ïa ka eksam NEET naba ka angnud ban pule doktor.
“Ha kane ka jingïakhun kaba nyngkongeh ïa kane ka Miss Diva Teen nga la long kaba la pynkhreh bha, nga la practice bad nga kwah shisha ban jop bad ban wanrah burom bad jingsarong ïa ka Meghalaya,” ong ka Samla Malang.
Ka la ong ba ki don haduh 39 ngut kiba ïakhun na kylleng ki jylla ka ri bad kin don ruh haduh 3 round. “Nga pynshlur ïa ki samla ba dei ban ngeit halade bad kaei kaei kaba kwah dei ban ïaid shakhmat naba phin poi sha khlieh jong ka nam,” ka la ong.
Katba u mama Dr. Dave Fredrick Malang u la ong ba ka samla Aishwariya ka la angnud ïa kane ka kam naduh ba dang khynnah bad ka la iaineh haduh mynta ban poi sha kane ka kyrdan ban shahjied haduh kane ka kyrdan jingïakob kaba heh duh ha India, kumta u la kyrpad ïa baroh ban ai ka jingkyrshan kaba khlaiñ na ka bynta jong ka.
Ka samla Aishwariya ka la sam ruh ïa ki jingim jong ka halor kane ka kam bad pynshlur ïa ki samla ban iaid shakhmat ki jingphoh sniew da ka jingshaniah bad jingaiti.