Pynkhreh ka sorkar ïa ka jaka theh ñuit ha Nonghali kaba heh 112 acre, ong u Bah Sniawbhalang Dhar

Shillong, Lber 03: U Symbud Myntri Rangbah ka jylla uba khmih ïa ka tnat Pynroi Sor u Bah Sniawbhalang Dhar u la ong ba kam don satia ka jaka theh ñuit kaba la batai ne kaba la batai hapoh ka National Standards for landfill area.
U la ong ba kane ka jaka ka donkam ïa ka jingkhmih bniah kaba dei ban long katkum ka stad saïan bad kumjuh ruh ka jingbret ïa ki ñuit ka dei ban long ha ka rukom kaba biang, bad na ka bynta ki nongshong shnong ka nongbah Shillong ka donkam ka jaka kaba heh kumba 100-150 acre, ïathuh u Bah Dhar haba jubab ïa ka jingkylli ba la wanrah ha ka sngi Nyngkong hapoh ka Dorbar Mang Tyngka.
U la ong ruh ba kam shym la don kano kano ka national standard kaba long katkum ka jingïoh ha kaba ïadei bad kane ka jingbret ïa ki ñuit.
U la pyntip ruh ba ka jaka kaba la tyrwa na ka bynta ban theh ñuit kaba don ha Nonghali ka dei kaba heh kumba 112 acre bad kadei ruh ka jaka ba la pynkhreh da ka sorkar jylla.