Pynkhreh ka sorkar ban pynheh ïa ka Umroi Airport ha ka jinglut ba T. 500 klur

Nongpoh, Nailur 23: Ka sorkar jylla ka la don ha ka lynti ban pynheh noh ïa ka kad liengsuin ha Umroi kaba long kawei na ka thong ban pynsuk ïa ki paidbah nongleit nongwan na ka jylla bad ha kajuh ka por ruh ka ban long kum kata ka lad ban ai kam ai jam ïa ki khun samla lada la lah ban pynheh bad pyntreikam ïa kane ka kad liengsuin kaba don ha Umroi ha Ri Bhoi District.
U Symbud Myntri ka sorkar jylla bad uba dei ruh u myntri ba peit ïa ka tnad Transport u Bah Sniawbhalang Dhar mynta ka sngi u la leit ban jurip bad ban pynlong ïa ka jingïalang ha Umroi Airpot na ka bynta ban ïa thir ne ïa tai halor ki lad ki lynti ban pynheh noh ïa kane ka kad liengsuin jong ka jylla.
Ha kae ka sngi la don lang ruh naduh u MLA ka Umroi, u Bah Damanbait Lamare, u Chief Secretary ka jylla u Bah D.P Wahlang, u Deputy Commissioner ka Ri Bhoi, u Abhilash Baranwal, u Regional Executive Director ka AAI u M. Raja Kishore, u Director ka Umroi Airport u Rajeev Ranjan bad kynthup ruh ki ophisar na ka sorkar jylla bad na ka Airport Authority of India.
Haba kren sha ki lad pathai hadien ka jingïalang bad ka jingjurip ïa katei ka Kad Liengsuin, u Symbud Myntri ka sorkar jylla bad uba dei ruh u Myntri ka tnad Transport u Bah Sniawbhalang Dhar, u la ong ba ka jingthmu kane ka jingwan jurip bad ka jingïakynduh lang bad ki bor ba dei peit ka Airport Authority of India ka dei ka jingthmu ka sorkar jylla ban pynheh noh ïa kane ka kad liengsuin jong ka jylla.
“Ka jingthmu ban pynheh ïa kane ka kad liengsuin kam dei satia tang ban pynsuk ïa ki paidbah ha ka leit ka wan haba ki leit sha ki jylla bapher bapher ka ri bad kane ka long ruh shi bynta ban ai kam ai jam ïa ki samla ka jylla, lada la lah ban pyntreikam noh ïa ki Liengsuin kiba heh ban kit ïa ki nongleit nongwan” ong u Bah Sniawbhalang Dhar.
U la ong ruh na ka bynta ban pynheh ïa ka kad liengsuin dang donkam ban ioh sa 16 akar ka jaka bad 6 akar ka jaka na ka bynta ka parking Bay bad kynthup ruh ïa ka ‘Run Way’, ba kin wan ki liengsuin kiba heh, ha kaba ka sorkar kan shim khia ban kren sha ka sorkar kmie halor shibun ki kyndon kiba dang hap ban ioh jingbit na ka sorkar kmie.
U la ïathuh ruh na kane ka jingïakynduh lang ba ki bor ba dei peit ka Airport Authority of India, un sa rah ïa kane ka phang ha ka kynhun myntri (Cabinet Minister) ban ïa tai sani bad ruh ban shim ïa kita ki lad ki lynti ban pan jingbit na ka sorkar kmie halor shibun ki kyndon kiba ïa dei bad ka jingpynheh ïa kane ka kad liengsuin ha Umroi.
U bynrap ruh da kaba ong, ha kaba pynheh ïa kane ka kad liengsuin ka jinglut ka kan poi beit sha ka T. 500 klur bad ruh ka sorkar jylla kan shim khia ban ïa thir sani na ka bynta ki lad ki lynti kiba ïa dei bad ka jingpynheh ïa kane ka kad liengsuin.
Shuh shuh, u la ïathuh ruh ka jingangnud ka sorkar ban pynheh ïa kane ka Kad Lingsuin ka long ban pynsuk ïa ki khun ki kti hadien habud haba la don la ka jong ka kad liengsuin kaba heh bad la kumno kumno ruh ka sorkar jylla kan sa shim khia ba tang hapoh 2 ne 3 snem yn pyndep noh ïa kane ka kam, u la bynrap.