Shillong, Nohprah 14: Ka kynhun ïalehkai jong ka Shillong Lajong FC ka la nang pynkhreh ïalade ban aireng shabar nala ïing ha Srinagar ha kaba kan sa ïakhun pyrshah ïa ka Real Kashmir lashai ka sngi, ka 16 tarik Nohprah ha ka por 2 baje nohphai sngi ha madan TRC Turf Ground.
Kane kan dei ka jingïakhun kaba lai shabar nala ïing ïa ka Lajong mynta ka samoi hadien ka jingïalehkai pyrshah ïa ka Mohammedan SC nangta ïa ka Rajasthan United kiba ka kynhun ka la ïakhaid da 1-1 kol ha baroh ar.
Haba phai sha ka kynhun, ka shong mynta ha ka kyrdan ba 5 jong ka miej da 16 point naki 9 sien ïalehkai ba ladep.
Katba ka Real Kashmir, ka kynhun ba ka Lajong kan sa aireng, ka shong ha ka kyrdan ba 3 da 17 point naki 9 sien ïakhun bad tam da shi point ïa ka Lajong.
Shuh shuh, ka Lajong kan sa hap ban aireng ïa ka Real Kashmir khlem ka jingdon katto katne ki player ba kynsai kiba dang hapdeng ka jingmynsaw, kiba kynthup ïa u Phrangki Buam, Damaitphang Lyngdoh, Kenstar Kharshong, Everbrightson Sana Mylliempdah bad u Sangti Janai Shianglong.
Na ka liang jong ka kynhun ka khmihlynti ba kine ki player kin wanphai ha ka jingïakhun ka ban long hala ïing pyrshah ïa ka Namdhari FC ha ka 23 tarik Nohprah.
Hynrei watla kata ruh, ka Lajong ka don jingkyrmen hadien ka jingwanphai biang u rangïalehkai midfield ha ka kynhun, u Renan Paulino De Souza hadien ba shah sospon naba ïohpdiang saw tylli ki yellow card ha ki jingïalehkai ba ladep bad kyrmen ruh ba kan ïoh khur ïa ka jingjop pyrshah ïa ka Real Kashmir lashai ka Sngi Saitjaiñ.
