Nongstoiñ, Lber, 14: Ki nongïalam jong ka seng FKJGP ka dap da ka jingsngewkhia halor ki jingïai jia ki jingpyndik ki nongshong jong ka Meghalaya ha ka sorkar Assam na ka por sha ka por bad ban kyntu ban ïa pynkhlaiñ ïa ki bor pahara ha ki khappud ka West Khasi Hills khamtam eh ka Langpih.
“Ka long kaei kaei kaba pynsngew dom haba tang u forest police u la lah ban pyndik kat ïa u sordar shnong, wat haduh ban byrngem byrsit. Kaba kham sngew riew khlaw ka long ba ïa ka mobile ruh knieh kaba dei ka tiar shi met jong u briew. Hato lah ban don ki jingdonkam bapher bapher lane ki personal details, hato u to u khar Assam u lah ban kit khlieh lada jia eiei ïa ki personal details jong u sordar”, buh jingkylli u Bah Chandra Nongkhar President FKJGP West Khasi Hills.
“Kane baroh ka jïa ka dei ka jingkheiñ sting jong ka sorkar MDA kaba lah dep hapoh ka jingïalam jong u Conrad sangma. Ka seng ka pynrem jur ïa kane ka sorkar, namar kam lah ban teh lakam ïa ka Assam halor ka jingleh riew khlaw bad leh baheh ïa ki briew jong ngi. Ka jingdawa ruh mynta ka long ïa kane ka sorkar MDA 2, ba kan pynstet noh ïa ka kam pynbeit pud, namar ka Assam man ka por ka pyni bor naduh ki por mynshwa”.
“Ka Meghalaya baroh shikatta ka long tang ka nongpeit kai, ka suk ban ïa pynbeit mynta namar ka dei kajuh hi ka sorkar. Lada kam lah ban leh imat ka ap haduh ban da jia biang kum ha Langpih ha ki snem ba lah leit bad ha Mukroh ba dang shu dep, kat haduh ba u CM Assam u la kam syndon ha kine ki sngi ba ka Mukroh ka hap hapoh u pud u sam ka Assam”, ong u Bah Chandra Nongkhar.
