Khliehriat, Jylliew 20: U District Magistrate ka East Jaiñtia Hills District, u la pynbna paidbah ïa ka jingpyntreikam ïa ki kyndon kiba hapoh ka 163 Bharatiya Nagarik Suraksha Sanhita, 2023 (BNSS) ha shilynter ka surok kaba naduh Samasi ter ter kaba tip kum ka surok MRL25-Semmasi-Lakaseiñ Road namar ba dang shna ïa ka surok-Sammasi-Lakaseiñ Road kaba hapoh ka PMGSY-III, 2024-25. U District Magistrate u la pynjari ïa katei ka kyndon dei namar ba u la ïoh ki kaiphod na u Executive Engineer, P.W.D. (Roads), Khliehriat Division, uba la ïathuh ba ka jingpyntrei ïa ka surok MRL25-Semmasi-Lakaseiñ Road under PMGSY-III, 2024-25 ka dang ïaid shaid shaid bad khamtam ka jingpyntrei ïa ki bynta kiba da ka dewbilat lane ka Cement Treated Base (CTB) ka dang ïaid bad donkam bun sngi ban ieh ba kan neh kan skhem ka dewbilat, te khnang ba ka jingtrei kan ïaid khlem kano kano ka jingthut la pynjarai ïa ka 163 BNS ha katei ka thaiñ.
Kumjuh ruh ba ka kam jingpyntrei ïa ka surok kan ïaid beit bad ruh na ka bynta ka jingshngaiñ ki paidbah ba leit ba wan katkum ka hukum na u District Magistrate la mana ban ïaid ki kali heh (HMVs), kynthup ki trok, ki trailer bad kiwei kiwei ki kali heh khamtam kiba kit jingkit bad ka jingpyntreikam ïa ki kyndon ka 163 BNSS kan neh haduh shi bnai lynter. Shuh shuh, ha kaba ïadei bad ka jingïaid ki kali rit pat (LMVs) yn peit da u Superintendent of Police, East Jaiñtia Hills District, Khliehriat ha ka jingïasngewthuh lang bad u Executive Engineer, ka tnat P.W.D (Roads), Khliehriat Division.
Na ka liang ka bor synshar district ka East Jaiñtia Hills District ka kyntu ïa ki trai kali, ki nongñiah kali bad ki paidbah ba kin ai ka jingïatreilang bad ki bor pynïaid district bad katkum ka hukum la ong ba lada lap ïano ïano kiba pynkheiñ ïa ka hukum kin shah pynshitom katkum ka aiñ kaba hapoh ka Section 223 jong ka Bharatiya Nyaya Sanhita, 2023 bad yn pynngat hapoh kiwei kiwei ki kyndon kiba ïadei bad ka aiñ ba pynkheiñ hukum bad kane ka hukum ruh kan treikam mardor tat haduh ban da pynbna da kumwei pat.
