Tura, Kyllalyngkot 23 : U Deputy Commissioner ka ka West Garo Hills District u la pynjari da ka kyndon 163 jong ka Bharatiya Nagarik Suraksha Sanhita (BNSS) ha ki katto katne ki jaka jong ka District hadien ka jingïoh khubor ïa ka jingshah shoh ki dkhot sengbhalang bad jingtieng ïoh mih ka jingkynad pher Jaidbynriew.
Kat kum ka hukum bala pynmih da u District Magistrate ne Deputy Commissiner u Vibhor Aggarwal, ka iathuh ba ka jingjia ïashoh ka la mih na ka thaiñ Goalgoan kaba hap hapoh ka Rajabala Police Station, kaba pynkhuslai ïa ka jinglah ban mih ka jingthut ka shongsuk shongsaiñ ha ki bynta jong ki jaka thor ka West Garo Hills.
Ka hukum ka ong ba ki jingjia ïakynad ba dang shen ha kane ka thaiñ kaba ïashong khleh jaidbynriew kala mih namar ka jingïaid ki khubor ba ïalam bakla, kaba lam sha ka jingbym ïashaniah hapdeng ki Jaidbynriew ba ïa im ïasah ha ka thaiñ.
Ki bor pynïaid District ki la pynpaw ïa ka jingdonkam mardor ïa ki lad jingïada khnang ban tehlakam ïa kino kino ki jingjia ki bym sngewtynnad.
Halor kane ka jingpynjari, la khang ban ïalum palat 5 ngut ki briew ha ka shijaka, ban ïarah ïa ki tiar pynmynsaw kynthup ki dieng, ki rod bad ki maw-ka ban sdang treikam naduh ka por 6 baje janmiet jong ka 23 tarik Kyllalyngkot haduh ka 6 baje mynstep tad haduh da pynmih da kawei pat ka jingpynbna.
Kane ka jingpynjari ka treikam ruh ha ki jaka kiba ikop don jingma ba hap hapoh u pud u sam ka Hallidayganj, Rajabala, Phulbari bad Tura Police Station. Kane ka hukum ka treikam ha ki 37 tylli ki shnong.
Ka jingpynkheiñ ïa kane ka hukum kan khring ïa ka jingshah pynshitom kat kum ka kyndon 223 jong ka Bharatiya Nyaya Sanhita (BNS) lane kiwei kiwei ki aiñ kiba lah ban pyntreikam, maham ki bor District.
